देशातील २१ लाख पीएफ खाती निष्क्रिय, ८,५०० कोटी रुपये पडून

वर्ष २०२३-२४ मध्ये २१ लाखांहून अधिक कर्मचारी भविष्य निर्वाह निधी खाती निष्क्रिय असून त्यात ८,५०५ कोटी रुपयांची रक्कम पडून असल्याचे सरकारने गुरुवारी राज्यसभेत सांगितले. केंद्रीय कामगार आणि रोजगार राज्यमंत्री शोभा करंदलाजे यांनी दिलेल्या माहितीनुसार, मागील वर्ष २०२२-२३ मध्ये १७.४ लाख खात्यांमध्ये ६,८०५ कोटी रुपये पडून होते, त्यात यंदा मोठी वाढ झाली आहे.

नोकरी सोडल्यानंतर सदस्यांनी पीएफ क्लेम न केल्यामुळे ही खाती निष्क्रिय झाली आहेत असे करंदलाजे यांनी स्पष्ट केले. ईपीएफओ सदस्याचे वय ५८ वर्षे पूर्ण होईपर्यंत व्याजाची रक्कम खात्यात जमा करत राहते आणि त्यानंतर खाते निष्क्रिय होते. सरकारने आता नवीन ईपीएफ योजना २०२६ अंतर्गत पीएफ क्लेमची प्रक्रिया ऑटो-इनिशिएशनद्वारे सुरू केली आहे. यामुळे पीएफची रक्कम थेट आधार लिंक असलेल्या बँक खात्यात जमा होणार आहे. तसेच निधी आपके निकट २.० अंतर्गत आउटरीच मोहिमा देखील राबवल्या जात आहेत.