સિસિલીમાં એન્ટોનેલો દા મેસિનાની 690 કરોડની ચાર કલાકૃતિઓની ચોરી

શનિવારે રાત્રે જ્યારે આખું શહેર એઝમ્પ્શન ડેની ઉજવણીમાં વ્યસ્ત હતું ત્યારે ચોરોએ સિસિલીના મ્યુઝિયો રિજિયોનાલે ડી મેસિનામાંથી આશરે 690 કરોડ રૂપિયાની કિંમતની ચાર પુનરુજ્જીવન કાળની કલાકૃતિઓની ચોરી કરી હતી. રૉયટર્સને ટાંકીને લાઈવમિન્ટના અહેવાલ મુજબ ચોરોએ સુરક્ષા વ્યવસ્થા અને એલાર્મને ચકમો આપીને 1473ની સાલના સાન ગ્રેગોરિયો પોલિપ્ટિકના ત્રણ પેનલ અને વર્જિન મેરી તથા મૃત ઈસુ ખ્રિસ્તના બે બાજુવાળા પેનલને એક આર્મર્ડ ડિસ્પ્લે કેસમાંથી ચોરી લીધા હતા. ભાગતી વખતે તેઓ મ્યુઝિયમની બહાર અન્ય બે પેનલ મૂકી ગયા હતા.

કલા નિષ્ણાત આલ્બર્ટો ફિઝે ચોરાયેલી કૃતિઓની કિંમત 690 કરોડ રૂપિયા આંકી છે. મ્યુઝિયમના ડિરેક્ટર મારિયા મર્કુરિયોએ આ ચોરીને મ્યુઝિયમ શહેર સમુદાય અને કલા જગત માટે ભારે નુકસાન ગણાવી છે. મેસિનાના ઉચ્ચ સંસ્કૃતિ અધિકારી એન્ઝો કારુસોએ આ ઘટનાને મોટી આફત ગણાવતા કહ્યું કે એન્ટોનેલો વિના મેસિના યુરોપિયન પુનરુજ્જીવનના મહાન કલાકારના સારથી વંચિત થઈ ગયું છે. આ વર્ષની શરૂઆતમાં ઇટાલીએ પાર્મા મ્યુઝિયમમાંથી અન્ય ત્રણ ચોરાયેલી કલાકૃતિઓ પાછી મેળવી હતી ત્યારબાદ આ ચોરીની ઘટના બની છે.