1991 ലെ സാമ്പത്തിക ഉദാരവൽക്കരണത്തിന് ശേഷം ദക്ഷിണേന്ത്യൻ സംസ്ഥാനങ്ങൾ മുന്നിലെന്ന് റിപ്പോർട്ട്

1991 ലെ സാമ്പത്തിക ഉദാരവൽക്കരണത്തിന് ശേഷം ദക്ഷിണേന്ത്യൻ സംസ്ഥാനങ്ങൾ മികച്ച സാമ്പത്തിക വളർച്ച കൈവരിച്ചതായി പ്രധാനമന്ത്രിയുടെ സാമ്പത്തിക ഉപദേശക സമിതി (EAC-PM) പുറത്തിറക്കിയ റിപ്പോർട്ടിൽ പറയുന്നു. സഞ്ജീവ് സന്യാൽ, ആകാംക്ഷ അറോറ എന്നിവർ ചേർന്ന് തയ്യാറാക്കിയ ഈ പഠനത്തിൽ ഉദാരവൽക്കരണത്തിന് ശേഷം ദക്ഷിണേന്ത്യൻ സംസ്ഥാനങ്ങളിൽ ആളോഹരി വരുമാനം വൻതോതിൽ വർധിച്ചതായും എന്നാൽ ഉത്തർപ്രദേശും ബിഹാറും വിഭജനത്തിന് ശേഷം പിന്നോക്കം പോയതായും ചൂണ്ടിക്കാട്ടുന്നു.

പടിഞ്ഞാറൻ സംസ്ഥാനങ്ങളിൽ മഹാരാഷ്ട്രയും ഗുജറാത്തും മികച്ച പ്രകടനം കാഴ്ചവെച്ചു. 2000 ങ്ങളുടെ തുടക്കം മുതൽ ഗുജറാത്ത് അതിവേഗ വളർച്ചയാണ് രേഖപ്പെടുത്തിയത്. വടക്കേ ഇന്ത്യയിൽ ഡൽഹിയും ഹരിയാനയും മികച്ച നേട്ടമുണ്ടാക്കി. എന്നാൽ ഹരിയാനയുടെ സാമ്പത്തിക കരുത്ത് കൂടുതലും ഗുരുഗ്രാമിലും സമീപ പ്രദേശങ്ങളിലും ഒതുങ്ങിനിൽക്കുകയാണെന്ന് ദി ഹിന്ദു റിപ്പോർട്ട് ചെയ്യുന്നു. 1960 കളിലെയും 70 കളിലെയും ഹരിതവിപ്ലവത്തിലൂടെ കുതിച്ചുചാട്ടം നടത്തിയ പഞ്ചാബിന്റെ പ്രകടനം പിന്നീട് തുടർച്ചയായി മന്ദഗതിയിലായി. കാർഷിക മേഖലയിലുള്ള അമിതമായ ശ്രദ്ധ വ്യാവസായിക പുരോഗതിയെ ബാധിച്ചോ എന്ന ചോദ്യം ഇതിലൂടെ ഉയരുന്നുണ്ട്. കിഴക്കൻ സംസ്ഥാനങ്ങളിലെ സ്ഥിതി ആശങ്കാജനകമാണ്. 1960 കളിൽ ആളോഹരി വരുമാനത്തിൽ മൂന്നാം സ്ഥാനത്തുണ്ടായിരുന്ന പശ്ചിമ ബംഗാൾ പിന്നീട് പതിനാലാം സ്ഥാനത്തേക്ക് പിന്തള്ളപ്പെട്ടു.

ഉദാരവൽക്കരണത്തിന് മുൻപ് പിന്നോക്കം നിന്നിരുന്ന രാജസ്ഥാനും ഒഡീഷയും അതിനുശേഷം നേരിയ പുരോഗതി രേഖപ്പെടുത്തിയിട്ടുണ്ട്. ഛത്തീസ്ഗഡിലും മധ്യപ്രദേശിലും ആളോഹരി വരുമാനം സ്ഥിരമായി താഴ്ന്ന നിലയിൽ തുടരുന്നു. ഗോവ, ഹിമാചൽ പ്രദേശ്, വടക്കുകിഴക്കൻ സംസ്ഥാനങ്ങൾ, ഡൽഹി ഒഴികെയുള്ള കേന്ദ്രഭരണ പ്രദേശങ്ങൾ എന്നിവയെ ഒഴിവാക്കി പ്രധാന സംസ്ഥാനങ്ങളെ മാത്രം ഉൾപ്പെടുത്തിയാണ് EAC-PM ഈ റിപ്പോർട്ട് തയ്യാറാക്കിയത്.