ஆந்திரா ஆண்டு தங்க உற்பத்தியை 4 டன்னாக உயர்த்த திட்டம்: சுரங்கச் செயலர்

ஆந்திரப் பிரதேசம், அடுத்த மூன்று முதல் நான்கு ஆண்டுகளில் தங்க உற்பத்தியை ஆண்டுக்கு 3-4 டன்னாக உயர்த்த திட்டமிட்டுள்ளது என்று மாநில சுரங்க செயலாளர் முகேஷ் குமார் மீனா ‘லைவ் மிண்ட்’ இணையதளத்திடம் தெரிவித்தார். கர்னூல் மாவட்டத்தில் உள்ள சுவர்ணகிரியில் ஜூன் மாதம் இந்தியாவின் முதல் தனியார் தங்க சுரங்கத் திட்டத்தை மாநிலம் தொடங்கியது. இதை ஜியோமைசோர் சர்வீசஸ் இந்தியா நிறுவனம் ரூ.405 கோடி செலவில் இயக்குகிறது. 1,500 ஏக்கர் பரப்பளவிலான இந்தத் தளத்தில் ஏறத்தாழ 50 டன் தங்க வளம் இருப்பதாக மதிப்பிடப்பட்டுள்ளது.

சுவர்ணகிரியில் அடுத்த ஆண்டு 1,000 கிலோ தங்கம் உற்பத்தி செய்ய எதிர்பார்க்கிறோம். இதன் மூலம் $140 மில்லியன் வெளிநாட்டு நாணயம் மிச்சமாகும் என்றும், மாநிலத்திற்கு ரூ.100 கோடி ராயல்டி கிடைக்கும் என்றும் மீனா தெரிவித்தார். இந்த ஆண்டு மேலும் ஆறு தங்கத் தொகுதிகள் கூட்டு உரிமங்களுக்காக ஏலம் விடப்படும். தங்கத்தைத் தாண்டி, 1,060 கிமீ நீள கடற்கரையோரம் 16 முக்கியமான கனிமங்களை ஆந்திரா அடையாளம் கண்டுள்ளது. இதில் அரிய மண் மற்றும் கடற்கரை மணல் கனிமங்கள் அடங்கும். 2029-30 ஆம் ஆண்டுக்குள் 7 இலட்சம் டன் இல்மெனைட்டை உற்பத்தி செய்து, இந்தியாவின் 100% டைட்டானியம் தேவையை (தற்போது 90% இறக்குமதி செய்யப்படுகிறது) பூர்த்தி செய்ய மாநிலம் இலக்கு நிர்ணயித்துள்ளது என்று மீனா கூறினார்.

கடற்கரை மணல் சுரங்கம் மற்றும் பதனீட்டிலிருந்து கனிமத் துறை 40,000 வேலை வாய்ப்புகளை உருவாக்கும் என்று மீனா தெரிவித்தார். சுவர்ணகிரி தற்போது 800 பேருக்கு வேலை வாய்ப்பளித்து வருகிறது; இது 2,000 ஆக உயரக்கூடும். ஒன்றிய பட்ஜெட்டில் இந்தியாவின் மூன்று ‘அரிய மண் வழித்தடங்களில்’ ஒன்றாக ஆந்திரா நியமிக்கப்பட்டுள்ளது. ஏறத்தாழ ரூ.50,000 கோடி முதலீட்டை ஈர்க்கும் வழிகாட்டுதலை மாநிலம் தயாரித்துள்ளது.