ఆగ్రాలో వరద ఉధృతి: మంచంపై నవజాత శిశువుతో నదిని దాటిన మహిళ

క్లుప్తంగా వార్త

ఆగ్రాలోని బాహ్ ప్రాంతంలో సరైన రహదారి లేదా వంతెన సదుపాయం లేకపోవడంతో వరద ఉధృతిలో ఉన్న ఉటంగన్ నదిని ఒక మహిళ, ఆమె నవజాత శిశువు మంచం సాయంతో దాటారు. రబ్బరు ట్యూబుపై మంచాన్ని ఉంచి దానిపై వారిని తరలించారు. బుధవారం రాత్రి ప్రసవ వేదనతో బాధపడుతున్న కేశ్వతిని కుటుంబ సభ్యులు ఇదే విధంగా నది దాటించి అంబులెన్స్ వరకు తీసుకెళ్లారు. ఫతేహాబాద్ సామాజిక ఆరోగ్య కేంద్రంలో ఆమె పండంటి మగబిడ్డకు జన్మనిచ్చింది. గురువారం ఉదయం డిశ్చార్జ్ అయిన తర్వాత మళ్లీ అదే పద్ధతిలో నదిని దాటి ఇంటికి చేరుకున్నారు. ఈ దృశ్యం సోషల్ మీడియాలో వైరల్ కావడంతో వంతెన నిర్మించాలనే డిమాండ్ మళ్లీ తెరపైకి వచ్చింది.

బాహ్ సబ్ డివిజనల్ మెజిస్ట్రేట్ వినోద్ కుమార్ స్పందిస్తూ వర్షాకాలంలో ఈ ప్రాంతంలో రవాణా సమస్యలు ఎదురవుతున్నాయని మాకు తెలుసు కానీ బ్లాక్ స్థాయి నిధులు వంతెన నిర్మాణానికి సరిపోవని చెప్పారు. దీనిపై రాష్ట్ర ప్రభుత్వానికి ప్రతిపాదనలు పంపామని ఆయన తెలిపారు.