ബഹിരാകാശ മേഖലയിൽ സിംഗിൾ വിൻഡോ ക്ലിയറൻസ് സംവിധാനം കൊണ്ടുവരാൻ കേന്ദ്ര സർക്കാർ ഒരുങ്ങുന്നു

ബഹിരാകാശ മേഖലയിലെ അനുമതികൾ വേഗത്തിലാക്കാനും നടപടിക്രമങ്ങൾ ലഘൂകരിക്കാനും പുതിയ സിംഗിൾ വിൻഡോ സംവിധാനം ആലോചിക്കുന്നതായി ഇടി റിപ്പോർട്ട് ചെയ്യുന്നു. ഇതിനായി നാഷണൽ സിംഗിൾ വിൻഡോ സിസ്റ്റം (NSWS) വിപുലീകരിക്കാനാണ് നീക്കം. ടെലികോം വകുപ്പ് (DoT), വാർത്താവിനിമയ മന്ത്രാലയം (MIB), ബഹിരാകാശ റെഗുലേറ്ററായ IN-SPACe എന്നിവർ ചേർന്ന് ഇതിനായുള്ള ചട്ടക്കൂടിന് തത്വത്തിൽ അംഗീകാരം നൽകി കഴിഞ്ഞു.

നിലവിൽ സ്റ്റാർലിങ്ക്, യൂട്ടെൽസാറ്റ് വൺവെബ്, ജിയോ സാറ്റലൈറ്റ് തുടങ്ങിയ വിദേശ കമ്പനികൾ ഉൾപ്പെടെയുള്ള ബഹിരാകാശ അധിഷ്ഠിത ബിസിനസുകൾക്ക് സുരക്ഷാ ക്ലിയറൻസിനായി വിവിധ മന്ത്രാലയങ്ങളുടെ അനുമതി ആവശ്യമാണ്. വിവിധ മന്ത്രാലയങ്ങളിൽ നിന്ന് അനുമതി ലഭിക്കുന്നത് ഏറെ സമയമെടുക്കുന്നതും ആവർത്തിച്ചുള്ള നടപടിക്രമങ്ങൾ ആവശ്യമുള്ളതുമാണെന്ന് ഉദ്യോഗസ്ഥർ ഇടിയോട് പറഞ്ഞു. സിംഗിൾ വിൻഡോ സംവിധാനം വരുന്നതോടെ അപേക്ഷകളുടെ അവസ്ഥ നിരീക്ഷിക്കുന്നത് എളുപ്പമാകും.

ബിസിനസ്സ് തുടങ്ങുന്നതിനും പ്രവർത്തിക്കുന്നതിനും എളുപ്പമുള്ള അന്തരീക്ഷം സൃഷ്ടിക്കുന്നതിനായി വ്യവസായ മേഖലയിൽ നിന്ന് സർക്കാർ നേരത്തെ നിർദേശങ്ങൾ തേടിയിരുന്നു. സങ്കീർണ്ണമായ നിയന്ത്രണങ്ങളും അനുമതി ലഭിക്കാനുള്ള കാലതാമസവും വ്യവസായരംഗം ചൂണ്ടിക്കാട്ടിയിരുന്നു. തുടക്കത്തിൽ IN-SPACe വഴി ലഭിക്കേണ്ട അനുമതികളാണ് ഈ സംവിധാനത്തിൽ ഉൾപ്പെടുത്തുക. തുടർന്ന് മറ്റ് മന്ത്രാലയങ്ങളുടെ അനുമതികളും ഇതിന്റെ ഭാഗമാക്കും.