ടെക്സാസിൽ ഭിന്നശേഷിക്കാരിയായ പെൺകുട്ടിക്ക് നേരെ ക്രൂരമർദ്ദനം, വീണ്ടും ആശുപത്രിയിൽ

ടെക്സാസിലെ സാൻ അന്റോണിയോയിൽ ഓട്ടിസം ബാധിച്ച 14 വയസ്സുകാരിയായ മാഡിസൺ മക്ഡൊണാൾഡിനെ വലതുകാലിലെ സ്വാധീനക്കുറവിനെത്തുടർന്ന് വീണ്ടും ആശുപത്രിയിൽ പ്രവേശിപ്പിച്ചു. നടുഭാഗത്തെ ഡിസ്കുകൾക്ക് സംഭവിച്ച തകരാറുകൾക്ക് പുറമെ തലച്ചോറിൽ ഒരു മുഴയും കണ്ടെത്തിയതായി മാതാവിനെ ഉദ്ധരിച്ച് മാധ്യമപ്രവർത്തക സാറാ ഫീൽഡ്സ് എക്സിലൂടെ അറിയിച്ചു.

2024 ഫെബ്രുവരിയിൽ സൾ റോസ് മിഡിൽ സ്കൂളിൽ വെച്ച് അഞ്ച് പെൺകുട്ടികൾ ചേർന്നാണ് മാഡിസണെ ആക്രമിച്ചത്. തലയിലും കഴുത്തിലും പുറത്തും മർദ്ദനമേറ്റ പെൺകുട്ടിയെ മുടിയിൽ പിടിച്ചുവലിക്കുകയും ചെയ്തിരുന്നു. സ്കൂളിൽ നടന്ന തുടർച്ചയായ മർദ്ദനങ്ങളെക്കുറിച്ച് പരാതി നൽകിയിട്ടും അധികൃതർ അത് അവഗണിച്ചതായി മാതാവ് ഹേസൽ മക്ഡൊണാൾഡ് ഡെയിലി മെയിലിനോട് പറഞ്ഞു. മകളുടെ പരാതികൾ കീറിക്കളയുകയും ക്ലാസ്സിലേക്ക് മടങ്ങിപ്പോകാൻ നിർദ്ദേശിക്കുകയുമായിരുന്നു സ്കൂൾ അധികൃതർ ചെയ്തത്.

ജില്ലാ നയങ്ങൾക്കനുസൃതമായി കർശനമായ അച്ചടക്ക നടപടികൾ സ്വീകരിച്ചതായും പോലീസ് കേസെടുത്തിട്ടുണ്ടെന്നും സ്കൂൾ അധികൃതർ അറിയിച്ചു. എന്നാൽ സ്കൂൾ അധികൃതർ സിസിടിവി ദൃശ്യങ്ങൾ പുറത്തുവിടാൻ തയ്യാറായില്ലെന്നും മകളെക്കൊണ്ട് കുറ്റം ഏറ്റുപറഞ്ഞ് കത്തെഴുതിച്ചെന്നും ആക്രമണം നടന്ന് ഒരു മണിക്കൂർ കഴിഞ്ഞിട്ടും 911-ൽ വിളിക്കാൻ തയ്യാറായില്ലെന്നും മാതാവ് ആരോപിക്കുന്നു. കുടുംബത്തിന്റെ ചികിത്സാ ചെലവുകൾക്കായി ഒരു ഗോഫണ്ട്മീ കാമ്പെയ്‌നും ആരംഭിച്ചിട്ടുണ്ട്.