റെയിൽവേ കുടിവെള്ളത്തിൽ ഇകോളി; 458 സ്റ്റേഷനുകളിലും അടിസ്ഥാന സൗകര്യങ്ങളില്ല

രാജ്യത്തെ എട്ട് റെയിൽവേ സ്റ്റേഷനുകളിലെ കുടിവെള്ള കൂളറുകളിൽ ഇകോളി ബാക്ടീരിയ കണ്ടെത്തിയതായി കണ്ട്രോളർ ആൻഡ് ഓഡിറ്റർ ജനറൽ (സിഎജി) റിപ്പോർട്ട്. 512 നോൺ-സബർബൻ സ്റ്റേഷനുകളിൽ 458 എണ്ണത്തിലും അടിസ്ഥാന സൗകര്യങ്ങളുടെ ഗുരുതരമായ കുറവുണ്ടെന്നും റിപ്പോർട്ട് ചൂണ്ടിക്കാട്ടുന്നു. കഴിഞ്ഞ ആഴ്ച പാർലമെന്റിൽ സമർപ്പിച്ച റിപ്പോർട്ടിൽ, ആറ് സോണുകളിലെ 59 സ്റ്റേഷനുകളിൽ ബാക്ടീരിയോളജിക്കൽ പരിശോധന നടത്തിയില്ല എന്ന് പറയുന്നു. ഛത്രപതി ശിവജി മഹാരാജ് ടെർമിനസ്, ഹൈദരാബാദ്, കോയമ്പത്തൂർ, പാലക്കാട് ജംഗ്ഷൻ എന്നിവിടങ്ങളിൽ നിന്നുള്ള ജലസാമ്പിളുകളിലാണ് ഇകോളി പോസിറ്റീവായത്.

2022-23 ൽ 49 സ്റ്റേഷനുകളിലും 2023-24 ൽ 56 സ്റ്റേഷനുകളിലും ടാപ്പുകളിൽ നിന്നുള്ള കുടിവെള്ളത്തിൽ കോളിഫോം ബാക്ടീരിയ അടങ്ങിയിട്ടുണ്ടെന്നും സിഎജി കണ്ടെത്തി. സൗകര്യങ്ങളുടെ കാര്യത്തിൽ, 201 സ്റ്റേഷനുകളിൽ ടോയ്ലറ്റുകളുടെ കുറവ്, 403 എണ്ണത്തിൽ യൂറിനലുകളുടെ കുറവ്, 2,035 സ്റ്റേഷനുകളിൽ വാട്ടർ ടാപ്പുകളുടെ കുറവ് എന്നിവ റിപ്പോർട്ടിൽ രേഖപ്പെടുത്തി. സിഎസ്എംടി, ഹൗറ, ന്യൂഡൽഹി, മുംബൈ സെൻട്രൽ തുടങ്ങിയ പ്രധാന സ്റ്റേഷനുകളിൽ ഇരിപ്പിടങ്ങൾ, ശുചിത്വം, ഡസ്റ്റ് ബിന്നുകൾ, ഇലക്ട്രോണിക് ഡിസ്പ്ലേ ബോർഡുകൾ എന്നിവയിലും കുറവുണ്ട്.

റിപ്പോർട്ടിനെ തുടർന്ന് റെയിൽവേ മന്ത്രി അശ്വിനി വൈഷ്ണവ് അവലോകന യോഗം ചേർന്നു. 20,000 സ്ഥലങ്ങളിൽ “ടാങ്ക് മുതൽ ടാപ്പ്” വരെയുള്ള വാട്ടർ ഫിൽട്രേഷൻ സിസ്റ്റം ഏർപ്പെടുത്തുമെന്നും വാട്ടർ ടാങ്കുകൾ മാറ്റിസ്ഥാപിക്കൽ, പതിവ് പരിശോധന, ഷെഡ്യൂൾ ചെയ്ത അറ്റകുറ്റപണികൾ എന്നിവ നടപ്പാക്കുമെന്നും റെയിൽവേ അറിയിച്ചു. ഉത്തരവാദിത്തം ഉറപ്പാക്കുന്നതിന് കേന്ദ്രീകൃത നിരീക്ഷണവും ഏർപ്പെടുത്തും.