പത്ത് ലക്ഷം കോടി രൂപയുടെ വായ്പകൾ റൈറ്റ് ഓഫ് ചെയ്തു; കേന്ദ്ര മന്ത്രി വെളിപ്പെടുത്തി

കേന്ദ്ര സഹമന്ത്രി പങ്കജ് ചൗധരി പാർലമെന്റിൽ നൽകിയ ലിഖിത മറുപടിയിൽ, കഴിഞ്ഞ പന്ത്രണ്ട് വർഷത്തിനിടെ (എൻഡിഎ ഭരണകാലത്ത്) ഏകദേശം 9,95,000 കോടി രൂപയുടെ വായ്പകൾ റൈറ്റ് ഓഫ് ചെയ്തതായി വെളിപ്പെടുത്തി. 2018-19 കാലത്ത് 1,48,753 കോടി രൂപയാണ് ഏറ്റവും കൂടുതൽ റൈറ്റ് ഓഫ് ചെയ്തത്. 2025-26 ആകുമ്പോഴേക്കും മൊത്തം കുടിശ്ശിക 63,19,057 കോടിയിൽ നിന്ന് 69,21,734 കോടിയായി വർധിച്ചതായും അദ്ദേഹം പറഞ്ഞു.

ദരിദ്രരുടെയും സാധാരണക്കാരുടെയും വായ്പകൾ കർശനമായി ഈടാക്കുകയും കോർപ്പറേറ്റ് വൻകിടക്കാരുടെ വായ്പകൾ റൈറ്റ് ഓഫ് എന്ന പേരിൽ എഴുതിത്തള്ളുകയും ചെയ്യുന്നുവെന്ന് പ്രതിപക്ഷം രൂക്ഷമായി വിമർശിച്ചു. ഇത് അക്കൗണ്ട് ബുക്കിലെ ക്രമീകരണം മാത്രമാണെന്നും വായ്പക്കാർക്ക് സ്ഥിരമായ ഇളവല്ലെന്നും മന്ത്രി പങ്കജ് ചൗധരി ന്യായീകരിച്ചു. 2025-ൽ റിസർവ് ബാങ്ക് ഓഫ് ഇന്ത്യ പുറപ്പെടുവിച്ച റെസല്യൂഷൻ ഓഫ് സ്ട്രെസ്ഡ് അസെറ്റ്സ് ഡയറക്ഷൻസ് അനുസരിച്ചാണ് ഈ നയം നടപ്പിലാക്കുന്നതെന്നും അദ്ദേഹം അറിയിച്ചു.

റൈറ്റ് ഓഫ് ചെയ്തതിന് ശേഷം കോർപ്പറേറ്റുകളിൽ നിന്ന് എങ്ങനെ തുക ഈടാക്കുമെന്ന ചോദ്യത്തിൽ പ്രതിപക്ഷം ആഞ്ഞടിച്ചു. ദരിദ്രർക്കും കർഷകർക്കും ഇത്തരത്തിലുള്ള വായ്പാ ആശ്വാസം നൽകാത്തത് എന്തുകൊണ്ടാണെന്നും അവർ ചോദിച്ചു. പ്രാദേശിക സ്ഥാപനങ്ങളുടെ തിരഞ്ഞെടുപ്പിന് ശേഷം ഈ വിഷയത്തിൽ പാർലമെന്റിൽ കൂടുതൽ ചർച്ച നടന്നേക്കും.