ഗൗതം ഗംഭീറുമായുള്ള ഭിന്നത: ഇന്ത്യൻ ക്രിക്കറ്റിൽ വലിയ പദവിയിലേക്ക് വിവിഎസ് ലക്ഷ്മൺ

ചുരുക്കത്തിൽ

ഇന്ത്യൻ ക്രിക്കറ്റിൻ്റെ ഭാവി മുഖ്യ പരിശീലകൻ ഗൗതം ഗംഭീറിൽ മാത്രം അർപ്പിക്കാൻ താൽപ്പര്യമില്ലെന്ന് വിരാട് കോലിയും രോഹിത് ശർമയും ബിസിസിഐയെ അറിയിച്ചതായി ഫ്രീ പ്രസ് ജേണൽ റിപ്പോർട്ട് ചെയ്യുന്നു. ഇരുതാരങ്ങളും അന്താരാഷ്ട്ര ക്രിക്കറ്റിൽ നിന്ന് വിരമിക്കാൻ ഉദ്ദേശിക്കുന്നില്ലെങ്കിലും ഗംഭീറുമായുള്ള ബന്ധത്തിലും ഡ്രസ്സിങ് റൂമിലെ അദ്ദേഹത്തിൻ്റെ അധികാരപ്രയോഗത്തിലും അതൃപ്തി പുകയുന്നുണ്ട്. ഗംഭീറിനെയോ ചീഫ് സെലക്ടർ അജിത് അഗാർക്കറെയോ ബിസിസിഐ ഉടൻ പുറത്താക്കാൻ സാധ്യതയില്ല. പകരം കൂടുതൽ കരുത്തുറ്റ ഒരു സംവിധാനം ഒരുക്കാനാണ് ബോർഡ് ശ്രമിക്കുന്നത്.

വിവിഎസ് ലക്ഷ്മണിന് കൂടുതൽ ഉത്തരവാദിത്തങ്ങൾ നൽകുന്നതിനെക്കുറിച്ച് ബിസിസിഐ ഗൗരവമായി ആലോചിക്കുന്നുണ്ട്. സഹപരിശീലകൻ, ചീഫ് സെലക്ടർ അല്ലെങ്കിൽ ക്രിക്കറ്റ് കാര്യങ്ങളിൽ അന്തിമ തീരുമാനമെടുക്കാൻ അധികാരമുള്ള ഡയറക്ടർ പദവി എന്നിവയാണ് പരിഗണനയിലുള്ളത്. ലക്ഷ്മണിൻ്റെ പരിചയസമ്പത്തും സീനിയർ താരങ്ങൾക്കിടയിലുള്ള വിശ്വാസ്യതയും ഗംഭീറും ടീമും തമ്മിലുള്ള അകലം കുറയ്ക്കാൻ സഹായിക്കുമെന്ന് ബോർഡ് കരുതുന്നു. മുൻപ് എംഎസ് ധോണിയോട് ഇത്തരമൊരു പദവി ഏറ്റെടുക്കാൻ ആവശ്യപ്പെട്ടെങ്കിലും അദ്ദേഹം അത് നിരസിച്ചിരുന്നു. ഗംഭീറിനെ പുറത്താക്കുന്നതിന് പകരം അധികാരകേന്ദ്രങ്ങളിൽ മാറ്റം വരുത്താനാണ് ബിസിസിഐയുടെ നീക്കം.