हंगेरीत पोलिश बस उलटली, १२ जण ठार तर १० जण जखमी

पूर्व हंगेरीमधील एम३ महामार्गावर रविवारी पहाटे पोलिश पर्यटकांची बस उलटल्याने किमान १२ जणांचा मृत्यू झाला असून १० जण गंभीर जखमी झाले आहेत. ५७ प्रवासी आणि दोन चालकांना घेऊन जाणारी ही बस मेझोकेरेस्तेसजवळ एका खड्ड्यात पडून उलटली असे पोलिसांनी सांगितले. अन्य ३७ प्रवाशांना किरकोळ दुखापत झाली आहे. या अपघाताचे नेमके कारण अद्याप स्पष्ट झालेले नाही परंतु द हिंदूच्या वृत्तानुसार प्राथमिक तपासात चालकाला डुलकी लागल्याचा संशय पोलिसांनी व्यक्त केला आहे.

हंगेरीचे पंतप्रधान पीटर मॅग्यार यांनी फेसबुकद्वारे शोक व्यक्त केला आहे. पोलंडचे अध्यक्ष कॅरोल नावरोकी आणि परराष्ट्र मंत्री राडोस्लाव सिकोर्स्की यांनी देखील घटनेवर प्रतिक्रिया दिली असून सिकोर्स्की यांनी दूतावासाच्या वतीने मदतकार्य सुरू असल्याचे सांगितले आहे. बस चालकाला पोलिसांनी ताब्यात घेतले आहे. २००३ मधील ३३ जणांचा बळी घेणाऱ्या रेल्वे आणि बस अपघातानंतरचा हा हंगेरीमधील सर्वात भीषण रस्ते अपघात असल्याचे द न्यू इंडियन एक्सप्रेसने नमूद केले आहे.