केरळमध्ये अरुणाचल प्रदेशच्या अभियांत्रिकी विद्यार्थ्याचा संशयास्पद मृत्यू

अरुणाचल प्रदेशचा बी टेक तृतीय वर्षाचा विद्यार्थी मिची मारपू (२०) शनिवारी संध्याकाळी केरळमधील कोथामंगलम येथे आपल्या भाड्याच्या खोलीत मृतावस्थेत आढळला. पोलिसांच्या माहितीनुसार तो जमिनीवर पडलेला असून त्याच्या गळ्याभोवती दोरी होती. त्याने छतावरून फाशी घेण्याचा प्रयत्न केला असावा आणि दोरी तुटल्याने तो खाली पडला असावा असा संशय पोलिसांनी व्यक्त केला आहे. घटनास्थळावरून इंग्रजी आणि हिंदी भाषेत लिहिलेली तीन पानांची सुसाईड नोट सापडली आहे.

पोलिसांच्या मते काही विषयांत कमी गुण मिळाल्याने शैक्षणिक वर्ष वाया जाण्याच्या भीतीने मारपूने आत्महत्या केली असावी. एमए कॉलेज ऑफ इंजिनिअरिंगच्या विद्यार्थ्यांनी या घटनेनंतर आंदोलनाचा इशारा दिला आहे. कॉलेजची २२ क्रेडिट्सची किमान अट ही केरळ टेक्नॉलॉजिकल युनिव्हर्सिटीने इतर इंजिनिअरिंग कॉलेजेससाठी निश्चित केलेल्या १८ क्रेडिट्सपेक्षा जास्त असल्याचा आरोप विद्यार्थ्यांनी केला आहे. एसएफआय आणि केएसयू नेत्यांनी हा मुद्दा उपस्थित केला असून कॉलेज प्रशासनाने अद्याप कोणतीही प्रतिक्रिया दिलेली नाही.

पोलिसांनी अपघाती मृत्यूची नोंद केली असून तपास सुरू आहे. मारपूचे नातेवाईक कोथामंगलम येथे पोहोचल्यानंतर मृतदेहाचे शवविच्छेदन करण्यात येईल.