बुडणाऱ्या मित्राला सोडून पळणे म्हणजे हत्या नव्हे, सर्वोच्च न्यायालयाचा महत्त्वपूर्ण निकाल

नदीत मित्र बुडाल्यानंतर घटनास्थळावरून पळून जाऊन चित्रपट पाहणाऱ्या दोन जणांना सर्वोच्च न्यायालयाने हत्येच्या आरोपातून निर्दोष मुक्त केले आहे. न्यायमूर्ती जे बी परडीवाला आणि के विनोद चंद्रन यांच्या खंडपीठाने सत्र न्यायालय आणि गुजरात उच्च न्यायालयाचा निकाल रद्दबातल ठरवत ही घटना अपघाती मृत्यू असल्याचे म्हटले आहे.

घटनास्थळावरून पळून जाणे आणि मदतीसाठी प्रयत्न न करता चित्रपट पाहायला जाणे हा गुन्ह्याचा पुरावा असल्याचे मानून उच्च न्यायालयाने या दोघांना जन्मठेपेची शिक्षा सुनावली होती. मात्र सर्वोच्च न्यायालयाने या मताशी असहमती दर्शवली. घबराट आणि मूर्खपणाचे वर्तन हे हत्येच्या शिक्षेचा एकमेव आधार असू शकत नाही असे निरीक्षण न्यायालयाने नोंदवले. मानवी मन कठीण प्रसंगात अनेकदा मूर्खपणाचे वागू शकते असे नमूद करत ही घटना पूर्वनियोजित हत्येपेक्षा अपघाती मृत्यूचीच असल्याचे अधिक स्पष्ट होत असल्याचे न्यायालयाने म्हटले आहे.

हत्येचा कोणताही ठोस पुरावा खंडपीठाला आढळला नाही. आरोपींचे कृत्य निषेधार्ह असले तरी ते हत्येचा गुन्हा सिद्ध करण्यासाठी पुरेसे नाही असे न्यायालयाने स्पष्ट केले. आरोपींनी घाबरल्यामुळे घटनास्थळावरून पळ काढल्याचा युक्तिवाद केला होता आणि न्यायालयाने तो मान्य करत या घटनेला एक दुर्दैवी अपघात मानले आहे.