ചൈനയിൽ നിന്ന് മെമ്മറി ചിപ്പ് വാങ്ങരുത്; ആപ്പിളിന് യുഎസ് നിർദേശം

ചൈനീസ് മെമ്മറി ചിപ്പ് വിതരണക്കാരെ ഒഴിവാക്കാൻ ആപ്പിളിനോട് ട്രംപ് ഭരണകൂടം നിർദേശിച്ചതായി യുഎസ് കൊമേഴ്സ് സെക്രട്ടറി ഹോവാർഡ് ലട്ട്നിക് അറിയിച്ചു. ഹ്യൂസ്റ്റണിലെ ആപ്പിൾ സൗകര്യം സന്ദർശിച്ച ശേഷമായിരുന്നു അദ്ദേഹത്തിന്റെ പ്രതികരണം. ചൈനയിൽ നിന്ന് മെമ്മറി ചിപ്പ് വാങ്ങുന്നതിനെ യുഎസ് ഭരണകൂടം “അനുകൂലിക്കുന്നില്ല” എന്നും ഇക്കാര്യം ആപ്പിളിനെ “വ്യക്തമായി” അറിയിച്ചിട്ടുണ്ടെന്നും ലട്ട്നിക് പറഞ്ഞു. ആഗോള ക്ഷാമത്തെ തുടർന്ന് മെമ്മറി ചിപ്പ് വില ഉയർന്ന സാഹചര്യത്തിൽ ചൈനീസ് കമ്പനികളായ സിഎക്സ്എംടി, യാംഗ്റ്റ്സെ മെമ്മറി ടെക്നോളജീസ് എന്നിവയുടെ ചിപ്പുകൾ ആപ്പിൾ പരീക്ഷിച്ച് വരികയാണ്.

യുഎസ് നിക്ഷേപങ്ങളും ഏഷ്യ കേന്ദ്രീകൃത വിതരണ ശൃംഖലയും തമ്മിലുള്ള സന്തുലിതാവസ്ഥ തേടുന്ന ആപ്പിളിന് ഈ സമ്മർദം കൂടുതൽ വെല്ലുവിളി സൃഷ്ടിക്കുന്നു. ചൈനീസ് ചിപ്പുകൾ ആപ്പിൾ ഉപയോഗിക്കുന്നത് തടയണമെന്നും ഇത് ആഭ്യന്തര ഉൽപ്പാദനത്തെ ബാധിക്കുമെന്നും യുഎസ് ആസ്ഥാനമായ മൈക്രോൺ ടെക്നോളജി ഭരണകൂടത്തോട് ആവശ്യപ്പെട്ടു. ജൂലൈയിൽ നിരവധി യുഎസ് സെനറ്റർമാർ ആപ്പിൾ സിഇഒ ടിം കുക്കിന് കത്തയച്ച് ചൈനീസ് മെമ്മറി നിർമ്മാതാക്കളെ ഒഴിവാക്കാൻ ആവശ്യപ്പെട്ടിരുന്നു. ചൈനീസ് ചിപ്പ് പരിശോധന സംബന്ധിച്ച് ആപ്പിൾ ചീഫ് ഓപ്പറേറ്റിംഗ് ഓഫീസർ സാബിഹ് ഖാൻ സ്ഥിരീകരിക്കാൻ വിസമ്മതിച്ചുവെങ്കിലും, ക്ഷാമം കാരണം “എല്ലാ ഓപ്ഷനുകളും പരിഗണിക്കേണ്ടതുണ്ട്” എന്ന് അദ്ദേഹം വ്യക്തമാക്കി.

കൂടുതൽ വിതരണ ശൃംഖലകൾ യുഎസിലേക്ക് മാറ്റാൻ ആപ്പിളിന് “നിരന്തരമായ” സമ്മർദം നൽകുമെന്നും വിപുലമായ നിർമ്മാണത്തെ അടിസ്ഥാനമാക്കിയുള്ള വിതരണ ശൃംഖലകൾ നിർമ്മിക്കാൻ ആപ്പിളിന് കഴിയുമെന്നും ലട്ട്നിക് പറഞ്ഞു. യുഎസിൽ നിർമ്മിച്ച ചിപ്പുകൾക്കായി പതിനായിരക്കണക്കിന് കോടി രൂപ ചെലവഴിക്കുന്നതും ടെക്സസിൽ മാക് മിനികൾ കൂട്ടിച്ചേർക്കുന്നതും ഉൾപ്പെടെ ആപ്പിളിൽ നിന്ന് ഭരണകൂടം പ്രതിബദ്ധത നേടിയിട്ടുണ്ട്. സെമികണ്ടക്ടർ ഉൽപ്പാദനം വിപുലീകരിക്കാൻ ഒരു വർഷത്തിലധികം സമയമെടുക്കുമെന്നും റിപ്പോർട്ടിൽ പറയുന്നു.