பெல்ஜியம் காட்டுத்தீ: ஜெர்மன் எல்லைப் பகுதியில் 600 பேர் வெளியேற்றம்

பெல்ஜியத்தின் ஹை பென்ஸ் இயற்கை காப்பகத்தில் கொழுந்துவிட்டு எரியும் காட்டுத்தீயால், ஜெர்மன் எல்லைக்கு அருகில் உள்ள லிஜே மாகாணத்தின் வைம்ஸ் மற்றும் பட்ஜென்பாக் நகராட்சிகளில் வசிக்கும் சுமார் 600 பேர் வெளியேற்றப்பட்டுள்ளனர். 27 சதுர கிலோமீட்டருக்கும் அதிகமான பரப்பளவில் பரவியுள்ள இந்த காட்டுத்தீ நாட்டின் சமீபத்திய வரலாற்றில் மிக மோசமான ஒன்றாகும் என இந்தியா டுடே செய்தி வெளியிட்டுள்ளது. பாதிக்கப்பட்ட மக்களுக்காக உடற்பயிற்சிக் கூடம் ஒன்று தற்காலிக முகாமக திறக்கப்பட்டுள்ளது. ஞாயிற்றுக்கிழமை காலை நிலவரப்படி எந்தவொரு குடியிருப்பும் சேதமடையவில்லை.

லிஜே மாகாண ஆளுநர் ஹெர்வ் ஜமர் கூறுகையில், 250 க்கும் மேற்பட்ட அவசரகால பணியாளர்கள் பணியில் ஈடுபடுத்தப்பட்டுள்ளனர் என்றும், இதில் பெல்ஜியம் மற்றும் ஜெர்மனியைச் சேர்ந்த 100 க்கும் மேற்பட்ட தீயணைப்பு வீரர்கள், காவல்துறையினர், ராணுவ அதிகாரிகள் மற்றும் சிவில் பாதுகாப்பு ஊழியர்கள் அடங்குவர் என்றும் தெரிவித்தார். தீயணைப்பு ஹெலிகாப்டர்கள் பயன்படுத்தப்பட்டு வருகின்றன. அவசரகால வாகனங்களுக்கு இடையூறு ஏற்படாமல் இருக்க மக்கள் அந்தப் பகுதியை விட்டு விலகி இருக்குமாறு அதிகாரிகள் கேட்டுக்கொண்டுள்ளனர். சில வாரங்களாக நிலவி வரும் கடுமையான வெப்பம் மற்றும் வறண்ட வானிலையைத் தொடர்ந்து இந்த தீ விபத்து ஏற்பட்டுள்ளது. வெள்ளிக்கிழமை அன்று வெப்பநிலை சுமார் 37 டிகிரி செல்சியஸை எட்டியது.

ஜெர்மனியில் உள்ள மான்ஷா நகரின் எல்லைக்கு அருகில் தீ விபத்து ஏற்பட்டுள்ளதால், புகையினால் ஏற்படும் உடல்நல பாதிப்புகளைத் தவிர்க்க எல்லைப்பகுதியிலுள்ள மூன்று மாவட்ட மக்கள் தற்காலிகமாக வெளியேறுமாறு அறிவுறுத்தப்பட்டுள்ளனர். ஹை பென்ஸ் பகுதியின் புல்வெளி மற்றும் சதுப்பு நிலப்பரப்பு காரணமாக தீயை அணைக்கும் பணிகள் சவாலாக உள்ளன.