அமெரிக்காவின் செயற்கை நுண்ணறிவு மாதிரிகளை இராணுவ பயிற்சிக்காக பயன்படுத்தும் சீனா

ஓப்பன் ஏஐ மற்றும் ஆந்த்ரோபிக் போன்ற முன்னணி அமெரிக்க நிறுவனங்களின் செயற்கை நுண்ணறிவு மாதிரிகளை சீன இராணுவ ஆராய்ச்சியாளர்கள் தங்களின் உள்நாட்டு பாதுகாப்பு அமைப்புகளை மேம்படுத்த பயன்படுத்தியுள்ளதாக 80 க்கும் மேற்பட்ட ஆய்வுக் கட்டுரைகள் மற்றும் காப்புரிமைகளை ஆய்வு செய்த ராய்ட்டர்ஸ் நிறுவனம் தெரிவித்துள்ளது. மாடல் டிஸ்டிலேஷன் என்று அழைக்கப்படும் இந்த நுட்பம் மூலம் பெரிய அளவிலான கணினி திறன் இல்லாமலேயே சிறிய அமைப்புகளை இயக்க முடியும்.

சீனாவின் பிஎல்ஏ பிரிவு 96941 வெளியிட்ட கட்டுரை ஒன்றில் ஓப்பன் ஏஐ நிறுவனத்தின் ஜிபிடி 3.5 மாதிரியை பயன்படுத்தி இராணுவத்தின் முக்கிய குறியீடுகளை ஆய்வு செய்ததும் பின்னர் அதன் சுருக்கங்களை கொண்டு உள்நாட்டு மாதிரியை உருவாக்கியதும் விவரிக்கப்பட்டுள்ளது. வட சீன பல்கலைக்கழக ஆராய்ச்சியாளர்கள் ஆந்த்ரோபிக் நிறுவனத்தின் கிளாட் 3 ஹைகு மாதிரியை சமூக ஊடகங்களை கண்காணிக்க பயன்படுத்தினர். 2024 ஆம் ஆண்டு வெளியான மற்றொரு பிஎல்ஏ கட்டுரையில் ஆளில்லா விமானங்களின் இலக்கை குறிவைத்தல் மற்றும் வழிகாட்டுதல் பணிகளுக்காக இந்த தொழில்நுட்பம் பயன்படுத்தப்பட்டது குறிப்பிடப்பட்டுள்ளது.

இந்த விவகாரம் அமெரிக்கா மற்றும் சீனா இடையிலான செயற்கை நுண்ணறிவு நிர்வாகம் குறித்த பேச்சுவார்த்தைகளில் முக்கிய புள்ளியாக உருவெடுத்துள்ளது. சீன நிறுவனங்கள் மேற்கத்திய தொழில்நுட்பங்களை திருடி பயன்படுத்துவதாக அமெரிக்கா குற்றம் சாட்டுகிறது. ஆனால் சீனா இதை திட்டவட்டமாக மறுத்து செயற்கை நுண்ணறிவு ஆதிக்கம் என விமர்சிக்கிறது. ஜேம்ஸ்டவுன் அறக்கட்டளை நிபுணர்கள் கூற்றுப்படி சீன இராணுவத்தினர் கண்காணிப்பு மற்றும் இணைய வழி தாக்குதல்களுக்காக மேற்கத்திய மாதிரிகளின் தொழில்நுட்பங்களை திட்டமிட்டு பயன்படுத்துகின்றனர்.