சந்திரனில் மோதியது ஸ்பேஸ் எக்ஸ் ராக்கெட் பாகம்: விஞ்ஞானிகள் உறுதி

சுமார் நான்கு டன் எடையுள்ள ஸ்பேஸ் எக்ஸ் ராக்கெட்டின் மேல் பகுதி எதிர்பாராத விதமாக புதன்கிழமை சந்திரனில் மோதியதாக கருதப்படுகிறது. இதனால் பூமிக்கு எந்த பாதிப்பும் இல்லை என்றாலும் நிலவில் பள்ளம் உருவாகும் என எதிர்பார்க்கப்படுகிறது. தி இந்து நாளிதழ் தகவலின்படி, பால்கன் 9 ரக ராக்கெட்டின் இந்த மேல் பகுதி, ஐன்ஸ்டீன் பள்ளத்திற்கு அருகில் மணிநேரத்திற்கு 8,690 கி.மீ வேகத்தில் 0635 GMT அளவில் மோதியது.

இந்த ராக்கெட் பாகம் கடந்த 2025 ஜனவரியில் இரண்டு நிலவு தரையிறங்கிகளை ஏந்திச் சென்ற பால்கன் 9 ராக்கெட்டிலிருந்து பிரிந்ததாகும். பாதுகாப்பு காரணங்களுக்காக முன்னெச்சரிக்கை நடவடிக்கைகள் எடுக்கப்பட்ட போதிலும், சூரிய செயல்பாடுகள் மற்றும் ஈர்ப்பு விசையினால் அந்த பாகம் நிலவை நோக்கி திசை திரும்பியதாக ஸ்பேஸ் எக்ஸ் இயக்குனர் ஜூலியானா ஷீமேன் தெரிவித்தார். லாஸ் அலமோஸ் தேசிய ஆய்வக விஞ்ஞானிகள் இந்த மோதலை முன்பே கணித்ததுடன், வானியலாளர்களை இதனை கண்காணிக்க வலியுறுத்தியிருந்தனர்.

நாசா மற்றும் தென் கொரியாவின் பாத்ஃபைண்டர் லூனார் ஆர்பிட்டர் ஆகியவை மோதிய இடத்தைப் புகைப்படம் எடுக்கத் திட்டமிட்டுள்ளன, ஆனால் அந்தப் படங்களைப் பெற சில நாட்கள் ஆகலாம். இந்த நிகழ்வு நிலவில் ஏற்படும் மோதல்கள் மற்றும் விண்வெளி குப்பைகளை ஆய்வு செய்ய ஒரு வாய்ப்பாகப் பார்க்கப்படுகிறது. பூமியின் சுற்றுப்பாதையில் 46,000-க்கும் மேற்பட்ட குப்பைகள் இருப்பதால், கெஸ்லர் சிண்ட்ரோம் போன்ற தொடர் சங்கிலி விபத்துகள் ஏற்பட வாய்ப்புள்ளதாக வல்லுநர்கள் எச்சரிக்கின்றனர்.