ಆರ್ಥಿಕ ತಜ್ಞ ಎಚ್ಚರಿಕೆ: ಸವಕಳಿ ಯುದ್ಧದಲ್ಲಿ ರಷ್ಯಾ ಗೆಲ್ಲದು

ರಷ್ಯಾದ ಸರ್ಕಾರಿ ಸ್ವಾಮ್ಯದ ವಿಇಬಿ ಬ್ಯಾಂಕಿನ ಮುಖ್ಯ ಅರ್ಥಶಾಸ್ತ್ರಜ್ಞ ಆಂಡ್ರೇ ಕ್ಲೆಪಾಚ್, ದೀರ್ಘಕಾಲೀನ ಸವಕಳಿ ಯುದ್ಧದಲ್ಲಿ ರಷ್ಯಾ ಉಕ್ರೇನ್ ವಿರುದ್ಧ ಜಯ ಸಾಧಿಸಲು ಸಾಧ್ಯವಾಗದಿರಬಹುದು ಎಚ್ಚರಿಕೆ ನೀಡಿದ್ದಾರೆ. ನಿಕಿಟ್ಸ್ಕಿ ಕ್ಲಬ್ ಅಧಿವೇಶನದಲ್ಲಿ ಮಾತನಾಡಿದ ಅವರು, ಪಾಶ್ಚಿಮಾತ್ಯ ನಿರ್ಬಂಧಗಳು, ಭಾರಿ ಮಿಲಿಟರಿ ವೆಚ್ಚ, ಮತ್ತು ಉಕ್ರೇನ್ ನಡೆಸಿದ ಬಂದರು, ತೈಲ ಸಂಸ್ಕರಣಾಗಾರ, ಹಾಗೂ ರಾಸಾಯನಿಕ ಕಾರ್ಖಾನೆಗಳ ಮೇಲಿನ ಹೊಡೆತಗಳು ಆರ್ಥಿಕ ವೆಚ್ಚವನ್ನು ಹೆಚ್ಚಿಸುತ್ತಿವೆ ಎಂದು ಹೇಳಿದ್ದಾರೆ. ಮಾಸ್ಕೋ ಟೈಮ್ಸ್ ಅವರ ಹೇಳಿಕೆಗಳನ್ನು ವರದಿ ಮಾಡಿದೆ.

ಕ್ಲೆಪಾಚ್ ಪ್ರಕಾರ, ರಷ್ಯಾ ಜಾಗತಿಕವಾಗಿ ತಾಂತ್ರಿಕ ಮತ್ತು ಆರ್ಥಿಕ ಸ್ಪರ್ಧೆಯಲ್ಲಿ ಹಿಂದುಳಿದಿದೆ. ಇದರಲ್ಲಿ ಚೀನಾ ಮತ್ತು ಅಮೆರಿಕ ಮಾತ್ರವಲ್ಲ, ಉಕ್ರೇನ್ ಕೂಡ ಮುಂದಿದೆ. ಉಕ್ರೇನ್ನ ಆರ್ಥಿಕತೆಯು ಭಾರಿ ಹಣಕಾಸು ನೆರವಿನಿಂದ ಬದುಕುಳಿಯುತ್ತಿದೆ. ರಷ್ಯಾದ ಆರ್ಥಿಕತೆ ಈ ವರ್ಷ ಹಿಂಜರಿತಕ್ಕೆ (ರಿಸೆಷನ್) ಸಿಲುಕಿದೆ. ವಿಮಾನಯಾನ, ನಿರ್ಮಾಣ, ಆಹಾರೋತ್ಪಾದನೆ ಮುಂತಾದ ನಾಗರಿಕ ಕೈಗಾರಿಕೆಗಳು ಕುಸಿಯುತ್ತಿವೆ ಎಂದು ಅವರು ಎಚ್ಚರಿಸಿದ್ದಾರೆ. ಕೇಂದ್ರ ಬ್ಯಾಂಕಿನ ಕಠಿಣ ನೀತಿಗಳು ಈ ಹಿಂಜರಿತಕ್ಕೆ ಸರಿಸುಮಾರು ಅರ್ಧದಷ್ಟು ಕಾರಣ ಎಂದು ಅವರು ಸೇರಿಸಿದ್ದಾರೆ.

ಮಹಾ ದೇಶಭಕ್ತಿ ಯುದ್ಧಕ್ಕಿಂತ ದೀರ್ಘಕಾಲದ ಸಂಘರ್ಷವು ಅಂತ್ಯವಿಲ್ಲದೆ ಮುಂದುವರಿಯುತ್ತಿದೆ ಮತ್ತು ಉಕ್ರೇನ್ ಹೊಡೆತಗಳಿಂದ ಉಂಟಾಗುವ ನಷ್ಟಗಳು ದೊಡ್ಡ ಸ್ಥೂಲ ಆರ್ಥಿಕ ಅಡಚಣೆಯಾಗಿ ಪರಿಣಮಿಸುತ್ತಿವೆ ಎಂದು ಅವರು ಎಚ್ಚರಿಸಿದರು. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಬಿಗಿಯಾದ ನಿರ್ಬಂಧಗಳು ಭಾರತ ಮತ್ತು ಚೀನಾಗಳನ್ನು ರಷ್ಯಾದ ತೈಲ ಖರೀದಿಯನ್ನು ಕಡಿಮೆ ಮಾಡುವಂತೆ ಒತ್ತಾಯಿಸಿದೆ. ಇದರಿಂದ ಬೆಳವಣಿಗೆ ದರ ಶೇ 1-1.5ಕ್ಕೆ ಸೀಮಿತವಾಗಿದೆ. ಈ ಒತ್ತಡಗಳು ರಷ್ಯಾದಲ್ಲಿ ಸಾಮಾಜಿಕ ಬಿಕ್ಕಟ್ಟಿಗೆ ಕಾರಣವಾಗಬಹುದು ಎಂದು ಕ್ಲೆಪಾಚ್ ಭವಿಷ್ಯ ನುಡಿದಿದ್ದಾರೆ.