അസം ചലച്ചിത്രകാരൻ മഹർഷി തുഹിൻ കശ്യപിന് ഇറ്റലിയിൽ ഫെല്ലിനി അവാർഡ്

അസം ചലച്ചിത്രകാരൻ മഹർഷി തുഹിൻ കശ്യപിന് ഇറ്റലിയിൽ ഫെല്ലിനി പുരസ്കാരം. പിസ്റ്റിച്ചിയിൽ നടന്ന 27-ാമത് ലുക്കാനിയ ഫിലിം ഫെസ്റ്റിവലിൽ സീക്രട്ട് പ്രോഗ്രാം ഫെല്ലിനി അവാർഡാണ് ലഭിച്ചത്. അദ്ദേഹത്തിന്റെ അസമീസ് ചിത്രമായ ‘കോക് കോക് കോകൂക്’നാണ് ഈ ബഹുമതി. ഇതിഹാസ ഇറ്റാലിയൻ ചലച്ചിത്രകാരൻ ഫെഡറിക്കോ ഫെല്ലിനിയുടെ പേരിലാണ് പുരസ്കാരം നൽകപ്പെടുന്നത്. ഫെസ്റ്റിവലിലെ സീക്രട്ട് പ്രോഗ്രാം ക്യൂറേറ്റ് ചെയ്തത് പ്രശസ്ത ഇറാനിയൻ ചലച്ചിത്രകാരൻ മൊഹ്സൻ മഖ്മൽബഫാണ്.

“ഞങ്ങളുടെ ചിത്രം ഇതിഹാസ സംവിധായകൻ മൊഹ്സൻ മഖ്മൽബഫ് ക്യൂറേറ്റ് ചെയ്യുകയും അദ്ദേഹത്തിൽ നിന്ന് അവാർഡ് ലഭിക്കുകയും ചെയ്യുന്നത് ഒരു സ്വപ്നം പോലെയാണ്,” കശ്യപ് പറഞ്ഞു. തന്റെ RX100 മോട്ടോർ സൈക്കിളുമായി ബന്ധപ്പെട്ട സിക്കൻ എന്ന കോഴി വിൽപ്പനക്കാരന്റെ കഥയാണ് ചിത്രം പറയുന്നത്. അസമിലെയും ഇന്ത്യയിലെയും രാഷ്ട്രീയവും കുടിയേറ്റവും പോലുള്ള സമകാലിക പ്രമേയങ്ങളുമായി മാജിക് റിയലിസത്തെ ഇത് സമന്വയിപ്പിക്കുന്നു. ബുസാൻ അന്താരാഷ്ട്ര ചലച്ചിത്രമേളയിലായിരുന്നു ചിത്രത്തിന്റെ ലോക പ്രിമിയർ. തുടർന്ന് കേരള അന്താരാഷ്ട്ര ചലച്ചിത്രമേള, ഢാക്ക അന്താരാഷ്ട്ര ചലച്ചിത്രമേള എന്നിവയുൾപ്പെടെ വിവിധ ഫെസ്റ്റിവലുകളിൽ പ്രദർശിപ്പിച്ചു.

സത്യജിത് റേ ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ടിലെ ഗ്രാജുവേഷൻ പ്രോജക്ടായിട്ടാണ് കശ്യപ് ഈ ചിത്രം നിർമ്മിച്ചത്. ചിത്രത്തിന്റെ അണിയറപ്രവർത്തകർക്ക് അദ്ദേഹം പുരസ്കാരം സമർപ്പിച്ചു. രാജു റോയ്, എത്തർ ജമീല പോളിനോ കെനി എന്നിവരാണ് പ്രധാന അഭിനേതാക്കൾ.