ഒഡീഷയിൽ ഹൈവേ തകർന്നു, മൂന്ന് ട്രക്കുകൾ കുഴിയിൽ വീണു

ഒഡീഷയിലെ കേന്ദ്രപാറ ജില്ലയിലെ നീലാചൽ ബസാറിന് സമീപം ദേശീയപാത 53-ലെ ഒരു ഭാഗം ബുധനാഴ്ച കനത്ത മഴയിൽ പെട്ടെന്ന് തകർന്ന് മൂന്ന് ട്രക്കുകൾ മറിഞ്ഞ് കുഴിയിൽ വീണു. മാർഷാഗായ് മേഖലയിലെ പാരാദീപ്-ചാണ്ടിഖോൾ പാതയിലാണ് സംഭവം.

തുടർച്ചയായ പേമാരിയെത്തുടർന്ന് പുതുതായി നിർമിച്ച ഹൈവേ തകർന്നതാണ് അപകടത്തിന് കാരണം. സ്ഥലത്ത് നിന്നുള്ള ദൃശ്യങ്ങളിൽ ട്രക്കുകൾ തകർന്ന റോഡിന് സമീപം വശങ്ങളിൽ കിടക്കുന്നത് കാണാം. ഇതുവരെ ആളപായമൊന്നും റിപ്പോർട്ട് ചെയ്തിട്ടില്ലെന്ന് ഉദ്യോഗസ്ഥർ പറഞ്ഞു.

ഈ പാതയിലെ ഗതാഗതം തടസ്സപ്പെട്ടിരിക്കുകയാണ്. അധികൃതർ സ്ഥലത്തെത്തി വാഹനങ്ങൾ നീക്കം ചെയ്യുന്നതിനും നാശനഷ്ടങ്ങൾ വിലയിരുത്തുന്നതിനുമുള്ള നടപടികൾ സ്വീകരിച്ചു. തകർച്ചയുടെ കാരണം അന്വേഷിച്ചുവരികയാണ്.