ತಮಿಳುನಾಡಿನ ಅತಿದೊಡ್ಡ ಸೋಲಾರ್ ಅಳವಡಿಕೆಗಾಗಿ ಚೆನ್ನೈನ ಅಪಾರ್ಟ್ಮೆಂಟ್ ಸಂಘಕ್ಕೆ ಪ್ರಶಸ್ತಿ

ಚೆನ್ನೈನ ಓಲ್ಡ್ ಮಹಾಬಲಿಪುರಂ ರಸ್ತೆಯಲ್ಲಿರುವ 1295 ಮನೆಗಳನ್ನೊಳಗೊಂಡ ಬೊಲ್ಲಿನೇನಿ ಹಿಲ್‌ಸೈಡ್ ಫೇಸ್ ಒನ್ ನಿವಾಸಿಗಳ ಸಂಘವು 194 ಕಿಲೋ ವ್ಯಾಟ್ ಸಾಮರ್ಥ್ಯದ ರೂಫ್‌ಟಾಪ್ ಸೋಲಾರ್ ವ್ಯವಸ್ಥೆಯನ್ನು ಅಳವಡಿಸಿದೆ. ಇದು ತಮಿಳುನಾಡಿನ ಯಾವುದೇ ನಿವಾಸಿಗಳ ಕಲ್ಯಾಣ ಸಂಘವು ಅಳವಡಿಸಿದ ಅತಿದೊಡ್ಡ ವ್ಯವಸ್ಥೆಯಾಗಿದೆ. ಈ ಸಾಧನೆಗಾಗಿ ತಮಿಳುನಾಡು ಸೋಲಾರ್ ಎನರ್ಜಿ ಡೆವಲಪರ್ಸ್ ಅಸೋಸಿಯೇಷನ್ (TNSEDA) ಈ ಸಂಘಕ್ಕೆ ಪ್ರಶಸ್ತಿಯನ್ನು ನೀಡಿದೆ. ಈ ಸೌರ ವಿದ್ಯುತ್ ಯೋಜನೆಯು ಆ ಸಮುದಾಯದ ಒಳಚರಂಡಿ ಮತ್ತು ಜಲ ಸಂಸ್ಕರಣಾ ಘಟಕಗಳಿಗೆ ವಿದ್ಯುತ್ ಪೂರೈಸುತ್ತದೆ.

ಈ ಯೋಜನೆಗೆ 1.1 ರಿಂದ 1.2 ಕೋಟಿ ರೂಪಾಯಿ ವೆಚ್ಚವಾಗಿದೆ. ಕೇಂದ್ರದ ಪಿಎಂ ಸೂರ್ಯ ಘರ್ ಯೋಜನೆಯಡಿ ಆರ್.ಡಬ್ಲ್ಯೂ.ಎ 35 ಲಕ್ಷ ರೂಪಾಯಿ ಸಬ್ಸಿಡಿಯನ್ನು ಪಡೆದಿದ್ದು ಇದರಿಂದ ನಿವ್ವಳ ಹೂಡಿಕೆ 85 ಲಕ್ಷ ರೂಪಾಯಿಗೆ ಇಳಿಕೆಯಾಗಿದೆ. ಸಮುದಾಯವು ವಾರ್ಷಿಕ 25 ಲಕ್ಷ ರೂಪಾಯಿ ಉಳಿತಾಯವನ್ನು ನಿರೀಕ್ಷಿಸುತ್ತಿದೆ ಮತ್ತು 3.5 ರಿಂದ 4 ವರ್ಷಗಳಲ್ಲಿ ಹೂಡಿಕೆಯು ಮರುಪಾವತಿಯಾಗಲಿದೆ. 100 ಕಿಲೋ ವ್ಯಾಟ್‌ಗಿಂತ ಹೆಚ್ಚಿನ ಅಳವಡಿಕೆಗಳಿಗೆ ವಿಧಿಸುವ ಹೆಚ್ಚಿನ ಸ್ಥಿರ ಶುಲ್ಕವನ್ನು ತಪ್ಪಿಸಲು ಈ ವ್ಯವಸ್ಥೆಯನ್ನು ಎರಡು 97 ಕಿಲೋ ವ್ಯಾಟ್ ಘಟಕಗಳಾಗಿ ವಿಂಗಡಿಸಲಾಗಿದೆ.

ಸಬ್ಸಿಡಿ ಪ್ರಕ್ರಿಯೆಯನ್ನು ನಿರ್ವಹಿಸಬಲ್ಲ ಮಾರಾಟಗಾರರನ್ನು ಹುಡುಕುವುದೇ ಅತ್ಯಂತ ಕಠಿಣ ಕೆಲಸವಾಗಿತ್ತು ಎಂದು ಆರ್.ಡಬ್ಲ್ಯೂ.ಎ ತಿಳಿಸಿದೆ. ಫೆಡರೇಷನ್ ಆಫ್ ಓ.ಎಂ.ಆರ್ ರೆಸಿಡೆಂಟ್ಸ್ ಅಸೋಸಿಯೇಷನ್ ನೀಡಿದ ಶಿಫಾರಸಿನ ಮೇರೆಗೆ ಅಂತಿಮವಾಗಿ ಕೊಯಮತ್ತೂರಿನ ವೆಸಾಟ್ ರಿನ್ಯೂವಬಲ್ಸ್ ಪ್ರೈವೇಟ್ ಲಿಮಿಟೆಡ್ ಅನ್ನು ಆಯ್ಕೆ ಮಾಡಲಾಯಿತು. ಈ ಸೋಲಾರ್ ವ್ಯವಸ್ಥೆಯ 25 ವರ್ಷಗಳ ಜೀವಿತಾವಧಿಯಲ್ಲಿ ಸುಮಾರು 7 ಕೋಟಿ ರೂಪಾಯಿಗೂ ಹೆಚ್ಚು ಹಣ ಉಳಿತಾಯವಾಗಲಿದೆ ಎಂದು ಸಮುದಾಯ ಅಂದಾಜಿಸಿದೆ.