अलास्काच्या पहिल्या कृष्णवर्णीय वकील आणि होमस्टेडर महाला डिकर्सन यांचे ९४ व्या वर्षी निधन

अलाबामामधील पहिल्या कृष्णवर्णीय महिला वकील आणि नंतर अलास्कामधील पहिल्या कृष्णवर्णीय वकील ठरलेल्या महाला ॲशले डिकर्सन यांचे २००७ मध्ये ९४ व्या वर्षी निधन झाले. द टाइम्स ऑफ इंडियाने दिलेल्या वृत्तानुसार डिकर्सन १९५८ मध्ये सुट्टी घालवण्यासाठी अलास्काला गेल्या होत्या आणि तिथे त्यांनी मातान्युस्का-सुसितना व्हॅलीमध्ये १६० एकर जमिनीचा दावा नोंदवला. याद्वारे त्या अलास्का राज्याच्या पहिल्या कृष्णवर्णीय होमस्टेडर बनल्या. त्यांनी काही महिन्यांतच अलास्का बार परीक्षा उत्तीर्ण करून आपल्या कारकीर्दीत आणखी एक मानाचा तुरा खोवला.

१९१२ मध्ये अलाबामातील मॉन्टगोमेरी येथे जन्मलेल्या डिकर्सन यांनी १९४५ मध्ये हॉवर्ड युनिव्हर्सिटीतून कायद्याची पदवी प्राप्त केली. १९४८ मध्ये अलाबामात परतल्यावर त्या राज्याच्या पहिल्या कृष्णवर्णीय महिला वकील बनल्या. नंतर त्या इंडियानाला गेल्या आणि तिथे बार असोसिएशनमध्ये प्रवेश मिळवणाऱ्या त्या दुसऱ्या कृष्णवर्णीय महिला ठरल्या. अलास्कामध्ये त्यांना भेदभावाचा सामना करावा लागला तरी त्यांनी वासिला आणि अँकरेज येथे कायदेशीर कार्यालये सुरू केली. युनिव्हर्सिटी ऑफ अलास्काविरुद्धच्या वेतन भेदभावाच्या खटल्यासह अनेक कठीण केसेस हाताळण्यासाठी त्या ओळखल्या जात होत्या.

डिकर्सन यांनी १९८३ ते १९८४ या काळात नॅशनल असोसिएशन ऑफ वुमन लॉयर्सच्या अध्यक्षपदाची जबाबदारी सांभाळली. १९९५ मध्ये अमेरिकन बार असोसिएशनने त्यांना उत्कृष्ट महिला वकिलांचा सन्मान म्हणून मार्गारेट ब्रेंट पुरस्कार देऊन गौरव केला. नॅशनल पार्क सर्व्हिसने कृष्णवर्णीय इतिहासातील महत्त्वाच्या व्यक्तींमध्ये त्यांचा समावेश केला आहे. त्यांचे आत्मचरित्र ‘डिलेज्ड जस्टीस फॉर सेल’ १९९८ मध्ये प्रकाशित झाले होते.