તાલિબાનના પાંચ વર્ષ: અફઘાનિસ્તાનમાં 25 લાખ છોકરીઓ શિક્ષણથી વંચિત

અફઘાનિસ્તાનમાં તાલિબાને પોતાની સત્તાના પાંચ વર્ષ પૂર્ણ થતા શનિવારે કાબુલમાં પરેડ યોજી હતી. જૂના અમેરિકી દૂતાવાસની બહાર બખ્તરબંધ વાહનોની પરેડ નીકળી હતી અને લડવૈયાઓએ ઝંડા સાથે માર્ચ કરી હતી. તાલિબાન આ દિવસને પશ્ચિમી તાકાતો પર વિજય તરીકે ઉજવી રહ્યું છે. ગૃહ મંત્રી સિરાજુદ્દીન હક્કાનીએ એક વીડિયો સંદેશમાં દેશમાં પ્રવર્તતી સમસ્યાઓનો સ્વીકાર કર્યો હતો.

તાલિબાનના શાસનમાં મહિલાઓ પરના કડક પ્રતિબંધોને કારણે અંદાજે 25 લાખ છોકરીઓ માધ્યમિક શાળા અને યુનિવર્સિટી જવા માટે વંચિત છે. સંયુક્ત રાષ્ટ્ર મહિલા સંસ્થાના જણાવ્યા અનુસાર અડધી અફઘાન મહિલાઓ મહિનામાં માત્ર એક કે બે વાર જ ઘરની બહાર નીકળી શકે છે. દેશની અંદાજે 4.5 કરોડની વસ્તીમાંથી અડધાથી વધુ લોકોને માનવીય મદદની જરૂર છે અને પાંચ વર્ષમાં બેરોજગારી લગભગ બમણી થઈ ગઈ છે. અત્યાર સુધી માત્ર રશિયાએ જ તાલિબાન સરકારને સત્તાવાર માન્યતા આપી છે જોકે ભારત ચીન અને કતાર જેવા દેશોએ રાજદ્વારી સંપર્ક વધાર્યો છે. અર્થતંત્ર વિશ્વની નાણાકીય સિસ્ટમથી લગભગ અલગ થઈ ગયું છે અને આંતરરાષ્ટ્રીય સહાયમાં મોટો ઘટાડો આવ્યો છે.