टीटीपीशी संबंध असल्याचा संशय असलेल्या तरुणाला बंगळुरू पोलिसांकडून अटक

बंगळुरू पोलिसांनी पश्चिम बंगालमधील २५ वर्षीय तरुणाला अटक केली आहे. हा तरुण तहरीक-ए-तालिबान पाकिस्तान (टीटीपी) च्या सदस्याशी संगनमत करून त्या संघटनेत सामील होण्याचा आणि पाकिस्तान सैन्य व भारताच्या विरोधात हल्ल्याचा कट रचत असल्याचा आरोप आहे. आसफुल मल्लिक असे या संशयिताचे नाव असून, पोलिसांना मिळालेल्या गोपनीय माहितीवरून त्याला ११ ऑगस्ट रोजी बोम्मासांद्र औद्योगिक परिसरातून ताब्यात घेण्यात आले. जिगनी येथे सुरक्षा रक्षक म्हणून काम करणारा मल्लिक फेसबुकच्या माध्यमातून अफगाणिस्तानातील टीटीपी सदस्य इम्रान अहिंदिरच्या संपर्कात होता.

द फेडरलच्या वृत्तानुसार पाकिस्तान सैन्याने मशिदींवर आणि तेथील नागरिकांवर केलेल्या कथित अत्याचारामुळे तसेच इस्रायल-पॅलेस्टाईन संघर्षात त्याने इस्रायलला दिलेल्या पाठिंब्यामुळे मल्लिक प्रभावित झाला होता. तपास पथकाला त्याच्या फोनमध्ये काही संदेश आणि ऑडिओ रेकॉर्डिंग सापडले असून त्यातून बदला घेण्याचा त्याचा मानस स्पष्ट होतो. त्याने पासपोर्ट मिळवून अफगाणिस्तानला जाण्यासाठी व्हिसाचा अर्जही केला होता मात्र तो तिथे पोहोचला नाही. भारतीय न्याय संहितेनुसार कट रचणे आणि दहशतवादी कृत्याला प्रोत्साहन देणे या कलमान्वये गुन्हा दाखल करण्यात आला आहे. या प्रकरणाचा अधिक तपास सुरू आहे.