ആർഡിഎഫ് ഫണ്ട് വിഷയത്തിൽ ശിവരാജ് സിംഗ് ചൗഹാൻ പച്ചക്കള്ളം പറയുന്നതെന്ന് പഞ്ചാബ് ധനമന്ത്രി

ഗ്രാമീണ വികസന ഫണ്ട് (ആർഡിഎഫ്) അനുവദിക്കുന്നതുമായി ബന്ധപ്പെട്ട് പഞ്ചാബ് മന്ത്രിമാർ ആരും കേന്ദ്രത്തെ സമീപിച്ചിട്ടില്ലെന്ന കേന്ദ്ര കൃഷിമന്ത്രി ശിവരാജ് സിംഗ് ചൗഹാന്റെ പ്രസ്താവന പച്ചക്കള്ളമാണെന്ന് പഞ്ചാബ് ധനമന്ത്രി ഹർപാൽ സിംഗ് ചീമ വെള്ളിയാഴ്ച പറഞ്ഞു. ബിജെപി നേതാക്കൾ നുണ പറയുന്നതിലും വസ്തുതകൾ വളച്ചൊടിക്കുന്നതിലും വിദഗ്ധരാണെന്നും പഞ്ചാബ് സർക്കാർ നിരന്തരം ഈ വിഷയം ഉന്നയിക്കുന്നുണ്ടെന്നും ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു.

പഞ്ചാബിന് എല്ലാ ഫണ്ടുകളും ചട്ടപ്രകാരം ലഭിക്കാറുണ്ടെന്ന് ചണ്ഡീഗഡിൽ മാധ്യമങ്ങളോട് പറഞ്ഞ ചൗഹാൻ, ഇക്കാര്യം ചർച്ച ചെയ്യാൻ സംസ്ഥാന മന്ത്രിമാരെ ക്ഷണിക്കുകയും ചെയ്തു. എന്നാൽ 2024 നവംബർ മുതൽ 2025 ജൂൺ വരെയുള്ള കാലയളവിൽ താനും മുഖ്യമന്ത്രി ഭഗവന്ത് മാനും പ്രൾഹാദ് ജോഷി, നിർമല സീതാരാമൻ, അമിത് ഷാ എന്നിവരുൾപ്പെടെയുള്ള കേന്ദ്രമന്ത്രിമാരെ നേരിൽ കണ്ടിട്ടുണ്ടെന്നും നിയമസഭാ സ്പീക്കർ കേന്ദ്രത്തിന് കത്തെഴുതിയിട്ടുണ്ടെന്നും ചീമ തിരിച്ചടിച്ചു. മിനിമം താങ്ങുവില (എംഎസ്പി) സംഭരണത്തിന്റെ 3 ശതമാനം വകയിരുത്തേണ്ട ആർഡിഎഫ് ഇനത്തിൽ 9,821 കോടി രൂപ പഞ്ചാബിന് ലഭിക്കാനുണ്ടെന്ന് അദ്ദേഹം വ്യക്തമാക്കി.

മുൻ അകാലി-ബിജെപി സർക്കാരിന്റെ കാലത്ത് ഫണ്ട് ദുരുപയോഗം ചെയ്തുവെന്ന് ആരോപിച്ചാണ് കേന്ദ്രം ഫണ്ട് തടഞ്ഞുവച്ചിരിക്കുന്നതെന്ന് ചീമ പറഞ്ഞു. എന്നാൽ എഎപി സർക്കാർ 2022ൽ നിയമം ഭേദഗതി ചെയ്ത് ഫണ്ട് ചെലവഴിക്കുന്നത് മണ്ടികളിലേക്കും ഗ്രാമീണ റോഡുകളിലേക്കുമായി പരിമിതപ്പെടുത്തിയിരുന്നു. ഫണ്ട് അനുവദിക്കണമെന്ന് ആവശ്യപ്പെട്ട് 2026 മാർച്ച് 14ന് അദ്ദേഹം സർക്കാരിന് ഔദ്യോഗിക കത്ത് അയച്ചിരുന്നെങ്കിലും അനുകൂലമായ ഒരു നടപടിയും ഉണ്ടായിട്ടില്ല.