தெற்கு லெபனானில் இஸ்ரேல் நடத்திய தாக்குதலில் 11 பேர் உயிரிழப்பு

தெற்கு லெபனானில் சனிக்கிழமை இஸ்ரேல் நடத்திய வான்வழித் தாக்குதலில் 11 பேர் கொல்லப்பட்டதாக லெபனான் சுகாதார அமைச்சகம் தெரிவித்துள்ளது. அமெரிக்காவின் மத்தியஸ்தத்தில் போர் நிறுத்த ஒப்பந்தம் மேற்கொள்ளப்பட்ட பிறகு நடந்த மிக மோசமான தாக்குதல்களில் இதுவும் ஒன்றாகும். அன்சார் பகுதியில் உள்ள ஒரு வீட்டின் மீது போர் விமானங்கள் நடத்திய தாக்குதலில் மூன்று குழந்தைகள் மற்றும் இரண்டு பெண்கள் உட்பட ஏழு பேர் உயிரிழந்தனர். டெய்ர் எல் ஜஹ்ரானியில் நடந்த மற்றொரு தாக்குதலில் நால்வர் கொல்லப்பட்டனர். இதில் 19 பேர் காயமடைந்ததாக தேசிய செய்தி நிறுவனம் தெரிவித்துள்ளது.

அன்சாரில் உள்ள ஹிஸ்புல்லாவின் ரத்வான் படை தலைமையகத்தின் மீது தாங்கள் தாக்குதல் நடத்தியதாகவும் அதில் தளபதி அலி சமீர் அல்-ஹஜ் ஹசன் மற்றும் சிலர் கொல்லப்பட்டதாகவும் இஸ்ரேலிய ராணுவம் கூறியது. ஹிஸ்புல்லா அமைப்பினர் வேண்டுமென்றே பொதுமக்களைப் போர்க்களத்திற்குள் வைத்திருப்பதாக இஸ்ரேல் குற்றம் சாட்டியுள்ளது. இந்தத் தாக்குதல்களுக்கு தகுந்த பதிலடி கொடுக்கப்படும் என்று ஹிஸ்புல்லா எச்சரித்துள்ளது. போர் நிறுத்தத்தை ஹிஸ்புல்லா மீறியதாலேயே இந்தத் தாக்குதல் நடத்தப்பட்டதாக இஸ்ரேலிய பிரதமர் பெஞ்சமின் நெதன்யாகு அலுவலகம் தெரிவித்துள்ளது.

இந்தத் தாக்குதல்கள் பேச்சுவார்த்தை மற்றும் அமெரிக்காவின் முயற்சிகளைக் குலைக்கும் நோக்கில் நடத்தப்பட்டவை என்று லெபனான் அதிபர் ஜோசப் அவுன் கூறியுள்ளார். லெபனானில் இஸ்ரேல் நிரந்தரமாக ராணுவத்தை வைத்திருப்பது ஒப்பந்தத்திற்கு எதிரானது என்று அமெரிக்க வெளியுறவுத்துறை தெரிவித்துள்ளது. ஹிஸ்புல்லா ஆயுதங்களைக் கைவிடும் வரை தெற்கு லெபனானில் தங்கள் படைகள் நிலைநிறுத்தப்படும் என்று இஸ்ரேல் கூறியுள்ளது. போர் நிறுத்த ஒப்பந்தத்தின்படி லெபனான் ராணுவம் அப்பகுதியின் கட்டுப்பாட்டை ஏற்கும் என எதிர்பார்க்கப்படுகிறது.