ದೆಹಲಿ: ವರದಕ್ಷಿಣೆ ಕಿರುಕುಳಕ್ಕೆ ಮಹಿಳೆ ಸಾವು, ಪತಿ ಹಾಗೂ ಅತ್ತೆಗೆ 12 ವರ್ಷ ಜೈಲು

ಜೂನ್ 2021 ರಲ್ಲಿ 10 ವಾರಗಳ ಗರ್ಭಿಣಿಯಾಗಿದ್ದಾಗ ಆತ್ಮಹತ್ಯೆ ಮಾಡಿಕೊಂಡ ಪತ್ನಿಯ ವರದಕ್ಷಿಣೆ ಸಾವು ಪ್ರಕರಣದಲ್ಲಿ, ದೆಹಲಿ ನ್ಯಾಯಾಲಯವು ನಿತೇಶ್ ಕಶ್ಯಪ್ ಮತ್ತು ಆತನ ತಾಯಿ ಮೀನಾ ಅವರಿಗೆ ತಲಾ 12 ವರ್ಷಗಳ ಕಠಿಣ ಕಾರಾಗೃಹ ಶಿಕ್ಷೆಯನ್ನು ವಿಧಿಸಿದೆ. ನಿರಂತರ ಕ್ರೌರ್ಯ ಮತ್ತು ಪದೇ ಪದೆ ವರದಕ್ಷಿಣೆ ಬೇಡಿಕೆಗಳೇ ಮಹಿಳೆ ಆತ್ಮಹತ್ಯೆ ಮಾಡಿಕೊಳ್ಳುವಂತೆ ಪ್ರೇರೇಪಿಸಿತು ಎಂದು ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶರಾದ ಪ್ರಿಯಾ ಮಹೇಂದ್ರಾ ಅಭಿಪ್ರಾಯಪಟ್ಟಿದ್ದಾರೆ. ಆಕೆಯ ನೈತಿಕತೆಯ ಬಗ್ಗೆ ಪ್ರಶ್ನಿಸಿದ್ದನ್ನು ನ್ಯಾಯಾಲಯವು ತೀವ್ರವಾಗಿ ಖಂಡಿಸಿದ್ದು ವರದಕ್ಷಿಣೆ ಕಿರುಕುಳದ ಬಳಿಕ ಇದು ಮತ್ತೊಂದು ದೊಡ್ಡ ಅಪರಾಧ ಎಂದು ಹೇಳಿದೆ.

ನಿತೇಶ್ ಮತ್ತು ಸಂತ್ರಸ್ತೆ 2021ರ ಮಾರ್ಚ್ 15ರಂದು ವಿವಾಹವಾಗಿದ್ದರು. ಮದುವೆಯಾದ ಮೂರು ತಿಂಗಳಲ್ಲೇ ಮಹಿಳೆ ತನ್ನ ಪತಿಯ ಮನೆಯಲ್ಲಿ ಸಾವನ್ನಪ್ಪಿದ್ದಾಳೆ. ಗರ್ಭಿಣಿಯಾದ ಬಳಿಕ ಹೆಚ್ಚು ದುಬಾರಿ ಮೋಟಾರ್ ಸೈಕಲ್ ಹಾಗೂ ಎಸಿಗಾಗಿ 30,000 ರೂಪಾಯಿ ಮತ್ತು ಸಂಬಂಧಿಕರಿಗೆ ಚಿನ್ನದ ವಸ್ತುಗಳನ್ನು ನೀಡುವಂತೆ ಒತ್ತಾಯಿಸಲಾಗುತ್ತಿತ್ತು ಎಂದು ಸರ್ಕಾರಿ ಅಭಿಯೋಜಕ ಕಮಲ್ ಅಖ್ತರ್ ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ. ಮಹಿಳೆ ಗರ್ಭಿಣಿಯಾಗಿದ್ದರೂ ಆಕೆಗೆ ಸರಿಯಾದ ಆಹಾರ ನೀಡುತ್ತಿರಲಿಲ್ಲ ಎಂಬುದನ್ನು ನ್ಯಾಯಾಲಯ ಗಮನಿಸಿದೆ. ಭಾರತೀಯ ಸಮಾಜದಲ್ಲಿ ವರದಕ್ಷಿಣೆ ಕಿರುಕುಳದ ಸಾವುಗಳು ಇನ್ನೂ ಜೀವಂತವಾಗಿವೆ ಎಂದು ಕಳವಳ ವ್ಯಕ್ತಪಡಿಸಿದ ನ್ಯಾಯಾಧೀಶರು, ಆರೋಪಿಗಳಾದ ತಾಯಿ ಮತ್ತು ಮಗನಿಗೆ ಯಾವುದೇ ಕರುಣೆ ತೋರಿಸಲು ಸಾಧ್ಯವಿಲ್ಲ ಎಂದು ಆದೇಶದಲ್ಲಿ ತಿಳಿಸಿದ್ದಾರೆ.