രണ്ടാം ലോകമഹായുദ്ധകാലത്തെ കപ്പലുകൾ പോലെ വിമാനവാഹിനികൾ രൂപകൽപ്പന ചെയ്യാൻ ട്രംപിന്റെ നിർദ്ദേശം

ഫോർഡ് ക്ലാസ് വിമാനവാഹിനികളുടെ കമാൻഡ് ടവറുകൾ രണ്ടാം ലോകമഹായുദ്ധകാലത്തെ യുദ്ധക്കപ്പലുകൾക്ക് സമാനമായി മാറ്റുന്നത് സംബന്ധിച്ച് യുഎസ് നാവികസേന പരിശോധന നടത്തുന്നതായി വാഷിംഗ്ടൺ പോസ്റ്റിനോട് ഏഴ് നിലവിലുള്ളതും മുൻപുള്ളതുമായ യുഎസ് ഉദ്യോഗസ്ഥർ വെളിപ്പെടുത്തി. കപ്പലിലെ കമാൻഡ് ടവർ അഥവാ ഐലൻഡിന്റെ സ്ഥാനമാറ്റമാണ് ഇതിൽ പ്രധാനം. നിലവിലെ ഫോർഡ് ക്ലാസ് കപ്പലുകളിൽ ഐലൻഡ് പിൻഭാഗത്തായാണ് സ്ഥിതി ചെയ്യുന്നത് എന്നാൽ അത് മുൻഭാഗത്തേക്ക് മാറ്റണമെന്നാണ് ട്രംപിന്റെ ആവശ്യം. എന്നാൽ ഇത്തരമൊരു മാറ്റത്തിന് വലിയ തോതിൽ പണവും സമയവും ചെലവാകുമെന്ന് ഉദ്യോഗസ്ഥർ മുന്നറിയിപ്പ് നൽകുന്നു. ട്രംപിന്റെ ആദ്യ ഭരണകാലത്ത് നടന്ന സമാനമായ പഠനത്തിൽ ഐലൻഡ് മാറ്റുന്നത് കോടിക്കണക്കിന് ഡോളർ നഷ്ടമുണ്ടാക്കുമെന്നും കപ്പൽ നിർമ്മാണം വൈകിപ്പിക്കുമെന്നും കണ്ടെത്തിയിരുന്നു.

ട്രംപ് ആവശ്യപ്പെടുന്ന ഏക ഡിസൈൻ മാറ്റം ഇതല്ല. വ്യാഴാഴ്ച അദ്ദേഹം ഒപ്പിട്ട ദേശീയ സുരക്ഷാ മെമ്മോറാണ്ടം പ്രകാരം ഭാവിയിലെ കപ്പലുകളിൽ ആധുനിക സാങ്കേതികവിദ്യയ്ക്ക് പകരം പഴയ രീതിയിലുള്ള സ്റ്റീം കാറ്റപ്പൾട്ടുകൾ തിരികെ കൊണ്ടുവരാൻ നാവികസേനയോട് നിർദ്ദേശിച്ചിട്ടുണ്ട്. രണ്ടാം ലോകമഹായുദ്ധകാലത്തെ കപ്പലുകളോട് ട്രംപിനുള്ള താൽപ്പര്യമാണ് ഈ നിർദ്ദേശങ്ങളിലൂടെ പ്രകടമാകുന്നത്. നിലവിൽ മൂന്ന് ഫോർഡ് ക്ലാസ് കപ്പലുകൾ വികസിപ്പിച്ചുകൊണ്ടിരിക്കുകയാണ്. യുഎസ്എസ് ജോൺ എഫ് കെന്നഡി കടലിൽ പരീക്ഷണങ്ങൾ നേരിടുമ്പോൾ യുഎസ്എസ് എന്റർപ്രൈസ്, യുഎസ്എസ് ഡോറിസ് മില്ലർ എന്നിവയുടെ നിർമ്മാണം നടന്നുവരുന്നു. ആദ്യ കപ്പലായ യുഎസ്എസ് ജെറാൾഡ് ആർ ഫോർഡ് ഇതിനകം പ്രവർത്തനസജ്ജമാണ്. അടുത്ത നാല് പതിറ്റാണ്ടിനുള്ളിൽ 10 ഫോർഡ് ക്ലാസ് കപ്പലുകൾ നിർമ്മിക്കാനാണ് നാവികസേന പദ്ധതിയിടുന്നത്. ഒരെണ്ണത്തിന് ഏകദേശം 22 ബില്യൺ ഡോളർ വീതമാണ് ചെലവ് പ്രതീക്ഷിക്കുന്നത്.