குருகிராம் தூய்மைப் பணியாளர்கள் வேலைநிறுத்தம் 10ஆவது நாளை எட்டியது: குவியும் குப்பைகள்

குருகிராமில் தூய்மைப் பணியாளர்களின் வேலைநிறுத்தம் சனிக்கிழமையுடன் 10ஆவது நாளை எட்டியுள்ளதால், நகரில் குப்பை மேலாண்மை நெருக்கடி தீவிரமடைந்துள்ளது. ஹரியானா சர்வ கரம்சாரி சங்கம் தலைமையிலான போராட்டக்காரர்கள், தங்கள் போராட்டத்தை ஆகஸ்ட் 18 வரை நீட்டித்துள்ளதாகவும், ஹரியானா அரசு தங்களின் கோரிக்கைகளை நிறைவேற்றாவிட்டால் காலவரையற்ற வேலைநிறுத்தத்தில் ஈடுபடப்போவதாகவும் எச்சரித்துள்ளதாக ஹிந்துஸ்தான் டைம்ஸ் செய்தி வெளியிட்டுள்ளது.

வேலை நீக்கம் செய்யப்பட்ட சுமார் 3,500 பணியாளர்களை மீண்டும் பணியில் அமர்த்த வேண்டும், ஒப்பந்த ஊழியர்களை பணி நிரந்தரம் செய்ய வேண்டும், தூய்மை மற்றும் பாதாள சாக்கடை பணிகளை தனியார் மயமாக்குவதை நிறுத்த வேண்டும், காலி பணியிடங்களை நிரப்ப வேண்டும் என்பன உள்ளிட்ட கோரிக்கைகளை ஊழியர்கள் வலியுறுத்துகின்றனர். கடந்த மே 13 அன்று எட்டப்பட்ட ஒப்பந்தம் நிறைவேற்றப்படவில்லை என்று சங்கத் தலைவர் வசந்த் குமார் கூறியுள்ளார். மேலும், 20 முதல் 25 ஆண்டுகள் பணியாற்றியும் ஒப்பந்த ஊழியர்கள் மாதம் ரூ. 8,000 முதல் ரூ. 9,000 வரை மட்டுமே ஊதியமாகப் பெறுகின்றனர் என்றும் அவர் குறிப்பிட்டார். சதார் பஜார் உள்ளிட்ட பல்வேறு பகுதிகளில் சேகரிக்கப்படாத குப்பைகள் பருவமழை நீருடன் கலந்து துர்நாற்றம் வீசுவதாகவும், பாதசாரிகள் நடந்து செல்ல இடையூறாக இருப்பதாகவும் மக்கள் தெரிவித்துள்ளனர்.

பெயர் வெளியிட விரும்பாத மூத்த மாநகராட்சி அதிகாரி ஒருவர், ஆட்கள் பற்றாக்குறையை ஒப்புக்கொண்டதுடன், கிடைக்கும் பணியாளர்களைக் கொண்டு நகர் முழுவதும் தூய்மைப் பணிகள் மேற்கொள்ளப்பட்டு வருவதாகத் தெரிவித்தார். கோரிக்கைகள் நிறைவேறும் வரை போராட்டம் தொடரும் என்றும், அடுத்த காலக்கெடு ஆகஸ்ட் 18 என நிர்ணயிக்கப்பட்டுள்ளதாகவும் ஹிந்துஸ்தான் டைம்ஸ் குறிப்பிடுகிறது.