புற்றுநோய் நோயாளிகளின் மெய்நிகர் இரட்டை சிகிச்சை பலனை முன்கூட்டியே கணிக்கும்

புற்றுநோய் நோயாளிகளுக்கு கதிரியக்க சிகிச்சையை வழங்கும் முன்பே, கணினி மாதிரியான ‘தெரானோஸ்டிக் டிஜிட்டல் இரட்டை’ மூலம் அதன் விளைவுகளை கணிக்க ஆராய்ச்சியாளர்கள் திட்டமிட்டுள்ளனர். இந்த ஆய்வு குறித்த விவரங்கள் ஃபிரான்டியர்ஸ் இன் பயோமெடிக்கல் டெக்னாலஜிஸ் இதழில் வெளியாகியுள்ளது. இதில் பரிதாபாத் சர்வோதயா மருத்துவமனையின் ஸ்வாகத் டாஷ் மற்றும் ஜெனிவா பல்கலைக்கழக மருத்துவமனை, ரசவி மருத்துவமனை மற்றும் ஈரானின் புஷேர் மருத்துவ பல்கலைக்கழக விஞ்ஞானிகள் இணைந்து பணியாற்றியுள்ளனர்.

இந்த டிஜிட்டல் இரட்டையானது ஸ்கேன் முடிவுகள், இரத்த பரிசோதனைகள் மற்றும் மருத்துவத் தரவுகளை செயற்கை நுண்ணறிவோடு இணைத்து, புரோஸ்டேட் புற்றுநோய்க்கான லுடீஷியம்-177 பிஎஸ்எம்ஏ போன்ற சிகிச்சைகளுக்கு கட்டிகளும் ஆரோக்கியமான உறுப்புகளும் எவ்வாறு எதிர்வினை ஆற்றும் என்பதை கணிக்கும். சர்வோதயா மருத்துவமனையின் அணு மருத்துவ இணை இயக்குநரான டாஷ் கூறுகையில், சிகிச்சை தொடங்கிய பின் பலனை எதிர்பார்ப்பதற்கு பதிலாக, மருத்துவர்கள் இந்த மெய்நிகர் மாதிரியில் பல்வேறு சிகிச்சை முறைகளை ஒப்பிட்டுப் பார்த்து சிறந்ததை தேர்வு செய்யலாம் என்றார்.

இந்த தொழில்நுட்பம் இன்னும் ஆராய்ச்சி நிலையிலேயே உள்ளது. இதற்கு பெரிய அளவிலான தரப்படுத்தப்பட்ட தரவுகளும், நோயாளியின் உடல்நிலை மாற்றங்களுக்கு ஏற்ப தொடர்ச்சியான அப்டேட்களும் தேவை. மருத்துவர்களுக்கு மாற்றாக அல்லாமல், அவர்களுக்கு துணையாகவே இந்த டிஜிட்டல் இரட்டை செயல்படும் என்று ஆசிரியர்கள் கூறுகின்றனர். ஆய்வில் குறிப்பிடப்பட்டுள்ள முந்தைய மருத்துவ தரவுகளின்படி, அதிக பிஎஸ்எம்ஏ டிரேசரை உள்வாங்கிய புரோஸ்டேட் புற்றுநோய் நோயாளிகளுக்கு 91 சதவீதம் சிகிச்சை பலன் கிடைத்துள்ளது, இது குறைந்த அளவு உறிஞ்சும் நோயாளிகளிடம் 52 சதவீதமாக மட்டுமே இருந்தது.