2026 ఉపాధ్యాయ పురస్కారాలకు రాష్ట్రస్థాయి కమిటీ ఏర్పాటు

2026 సంవత్సరానికి రాష్ట్ర ఉపాధ్యాయ పురస్కారాలకు అర్హులైన ఉపాధ్యాయులను ఎంపిక చేయడానికి ఆంధ్రప్రదేశ్ ప్రభుత్వం రాష్ట్రస్థాయి కమిటీని ఏర్పాటు చేసింది. గురువారం విద్యాశాఖ కార్యదర్శి కోన శశిధర్ ప్రభుత్వ ఉత్తర్వులు ఆర్టీ నెంబర్ 129 జారీ చేశారు. ఈ కమిటీ ఎంపిక ప్రక్రియను పర్యవేక్షించి, నిర్ణీత కోటాలో పురస్కార గ్రహీతల జాబితాను ఖరారు చేస్తుంది.

ఈ కమిటీకి మానవ వనరుల అభివృద్ధి శాఖ మంత్రి నారా లోకేష్ అధ్యక్షత వహిస్తారు. విద్యాశాఖ కార్యదర్శి ఉపాధ్యక్షుడిగా, పాఠశాల విద్యా సంచాలకులు సంయుక్త సమావేశకర్తగా వ్యవహరిస్తారు. ఆంధ్రప్రదేశ్ రాష్ట్ర విద్యా పరిశోధన, శిక్షణ మండలి సంచాలకులు, విద్యావేత్త, మాజీ ఎమ్మెల్సీ రాము సూర్యరావు ఇతర సభ్యులు. పాఠశాల విద్యా సంచాలకులు నిర్ణీత మార్గదర్శకాల ప్రకారం ఎంపిక ప్రక్రియను నిర్వహించాలని ప్రభుత్వం ఆదేశించింది.