മകൻ ഹോട്ടലിൽ ബുക്കിംഗ് നടത്തി; പേരു കണ്ടതോടെ ആശങ്കയിലായി ജീവനക്കാർ

മകന്റെ പിറന്നാൾ ദിനത്തിൽ ഹോട്ടലിൽ ബുക്കിംഗ് നടത്തിയപ്പോൾ ‘മുണ്ടെ’ എന്ന പേരു കണ്ട് ജീവനക്കാർ പരിഭ്രമിച്ചതായി മഹാരാഷ്ട്ര എഫ്ഡിഎ കമ്മീഷണർ തുക്കാറാം മുണ്ടെ വെളിപ്പെടുത്തി. എൻഡിടിവി പ്രോഫിറ്റിന് നൽകിയ പ്രത്യേക അഭിമുഖത്തിലാണ് അദ്ദേഹം ഇക്കാര്യം പറഞ്ഞത്. രണ്ട് ദിവസം മുൻപ് മകൻ ഓൺലൈൻ വഴി ടേബിൾ ബുക്ക് ചെയ്തപ്പോഴാണ് സംഭവം നടന്നത്. കമ്മീഷണർ തന്നെയാണോ എത്തുന്നതെന്ന് ഭയന്ന ജീവനക്കാർ അസ്വസ്ഥരായി. ഒടുവിൽ വിഷയം മുണ്ടെയുടെ സുഹൃത്തിന്റെ ശ്രദ്ധയിൽപ്പെടുകയും അദ്ദേഹം വിളിച്ച് അന്വേഷിക്കുകയും ചെയ്തു.

താൻ സാധാരണയായി ഹോട്ടലുകളിൽ പോകാറില്ലെന്നും പോകുമ്പോൾ തന്നെ ഭക്ഷണത്തിന്റെ ഗുണനിലവാരത്തെക്കുറിച്ചാണ് ചിന്തിക്കാറുള്ളതെന്നും മുണ്ടെ പറഞ്ഞു. തന്റെ വകുപ്പ് നടത്തുന്ന കർശനമായ പരിശോധനകൾ കാരണമാണ് ഹോട്ടലുകാർക്ക് ‘മുണ്ടെ’ എന്ന പേര് കേൾക്കുമ്പോൾ തന്നെ പേടിയുണ്ടാകുന്നതെന്ന് അദ്ദേഹം അഭിപ്രായപ്പെട്ടു. പൊതുജനാരോഗ്യത്തെ ബാധിക്കുന്ന നിയമലംഘനങ്ങൾ നടക്കുമ്പോൾ മാത്രമാണ് എഫ്ഡിഎ ലൈസൻസ് റദ്ദാക്കാറുള്ളത്. എല്ലാ സ്ഥാപനങ്ങളും നിയമം പാലിക്കുകയാണെങ്കിൽ റെയ്ഡുകളുടെ ആവശ്യമില്ലെന്നും അദ്ദേഹം കൂട്ടിച്ചേർത്തു.