அருணாச்சலப் பிரதேசத்தில் திடீர் வெள்ளம்: ஐந்து ராணுவ வீரர்கள் மாயம்

சுருக்கமான செய்தி

அருணாச்சலப் பிரதேசத்தின் திபாங் பள்ளத்தாக்கில் உள்ள ராணுவ முகாமில் வெள்ளிக்கிழமை ஏற்பட்ட திடீர் வெள்ளத்தில் இரண்டு தங்குமிடங்கள் அடித்துச் செல்லப்பட்டதில் ஐந்து ராணுவ வீரர்கள் மாயமாகியுள்ளனர் என்று மாநில அவசரக்கால கட்டுப்பாட்டு மையம் தெரிவித்துள்ளது. மிபி வட்டத்திற்கு அப்பால் சுமார் 25 கி.மீ தொலைவில் உள்ள பாசு பானி பகுதியில் மாலை 4.30 மணியளவில் இந்த வெள்ளப்பெருக்கு ஏற்பட்டது. வெள்ளத்தில் சிக்கிய ஏழு பேரில் இருவர் மீட்கப்பட்டனர். மாநில பேரிடர் மீட்புப் படை, தேசிய பேரிடர் மீட்புப் படை, காவல்துறை, இந்தோ-திபெத்திய எல்லைக் காவல் படை, எல்லைச் சாலைகள் அமைப்பு, உள்ளூர் தன்னார்வலர்கள் மற்றும் ராணுவக் குழுவினர் தேடுதல் வேட்டையில் ஈடுபட்டுள்ளனர்.

இதனிடையே மேல் சுபன்சிரி மாவட்டத்தில் உள்ள கியோஜாரிங்-பயாச்சிங் சாலையில் ஏற்பட்ட நிலச்சரிவில் சிக்கி பலர் புதையுண்டனர். அதிகாரிகளை மேற்கோள் காட்டி இந்துஸ்தான் டைம்ஸ் நான்கு பேர் உயிரிழந்ததாக செய்தி வெளியிட்டுள்ளது. நான்கு தொழிலாளர்கள் உயிரிழந்திருக்கலாம் என்று என்டிடிவி தெரிவித்துள்ளது. ஒரு உடல் மீட்கப்பட்டுள்ள நிலையில் தேடுதல் பணி தொடர்ந்து நடைபெறுகிறது.